Konrad av Bayern
| Konrad av Bayern | |||
 | |||
| Fødd | 1105 | ||
|---|---|---|---|
| Fødestad | Ravensburg | ||
| Daud | 17. mars 1154 | ||
| Dødsstad | Modugno | ||
| Yrke | munk | ||
| Helgendag | 9. februar | ||
Konrad av Bayern (ca. 1105–17. mars 1154) var ein cisterciensarmunk som var son av hertug Henrik den svarte av Bayern. Domkyrkja i Molfetta i Bari er vigd han. Han er vernehelgen for Molfetta, sjølv om han teknisk sett berre er saligkåra og ikkje utropt til helgen av den katolske kyrkja.
Konrad var fødd på Ravensburg rundt 1105. Han studerte teologi i Köln under erkebiskopen der, ein slektning. Meininga var at han skulle ettefølgja erkebispen i embetet, men i 1147 blei han inspirert av Bernhard av Clairvaux, som vitja byen, til å bli munk i staden. Han avla munkeløfte som cisterciensear til Bernhard i Clairvaux. I 1151 gav Bernhard han løyve til å dra til Det heilage landet for å bu som eremitt.[1]
I 1153 vende Konrad tilbake til Europa då han høyrde at Bernhard var blitt sjuk. Medan han var i Bari fekk han vita at Bernhard hadde døydd. Han vitja grava til den heilage Nikolas i Bari, og slo seg så ned som einebuar i ei hole i Modugno ved Molfetta. Han budde her til han døydde den 17. mars 1154 eller 1155.[1]
Konrad blei gravlagd i domkyrkja i Molfetta. Her oppstod det ein lokal kultus kring han, og kyrkja blei etterkvart vigd til han som San Corrado. Han blei saligkåra 7. april 1832 av pave Gregor XVI.[2][1] Den offisielle minnedagen hans er 15. februar, men han blir også minna 14. februar, 9. februar og på dødsdagen 17. mars. Molfetta har også ei translasjonsfeiring den 10. juli.
Kjelder[endre | endre wikiteksten]
- ↑ 1,0 1,1 1,2 «Den hellige Konrad av Bayern (~1105-1154/55)», Den katolske kirke (på norsk), henta 12. mai 2019
- ↑ Eintrag No.6 zum 17. März im Florilegium Martyrologii Romani des Ökumenischen Heiligenlexikons
- Delar av denne artikkelen bygger på «Conrad of Bavaria» frå Wikipedia på engelsk, den 12. mai 2019.