Nicolae Ceauşescu

Frå Wikipedia – det frie oppslagsverket
Gå til: navigering, søk
Nicolae Ceauşescu i 1979

Nicolae Ceauşescu (26. januar 191825. desember 1989) var ein rumensk kommunistisk politikar og Romania sin statsleiar frå 1965 til 1989.

Nicolae Ceauşescu vart fødd i Scorniceşti i 1918 og vart medlem av det rumenske kommunistpartiet i 1933. I 1965 vart han generalsekretær i partiet, og 1968 president i Romania. Ceauşescu dreiv ein utanrikspolitikk som uroa Moskva; han fordømde den sovjetiske invasjonen av Tsjekkoslovakia under opprøret der i 1968, og avslo å sende troppar dit. Dette gjorde han særs populær i vesten. Innanrikspolitisk var derimot Ceauşescu eit brutal despot og vart stundom samanlikna med Vlad Ţepeş (Grev Dracula). Under Ceauşescu sitt styre vart mellom anna det frykta hemmelege politiet Securitate danna.

Ceauşescu sitt styre var prega av ein enorm personkult han lukkast i å skape omkring seg sjølv. Han brukte store summar av økonomien i landet på mange monumentalprosjekt, slik at Romania utvikla seg til å verte eit av dei fattigaste og mest tilbakeståande landa i Euruopa. Medan Ceauşescu levde i luksus saman med familien sin, levde store delar av folket i stor fattigdom. Kona hans Elena Ceauşescu hadde t.d. 3000 par sko. Ceauşescu var òg ein omsynslaus diktator som systematisk forfølgde folk som tenkte annleis og minoritetar gjennom det frykta tryggingspolitiet Securitate. Dei aller fleste innbyggjarane innsåg at dei var undertrykt og bar på innesperra sinne. Få våga derimot å protestere på grunn av frykt for represaliar frå regimet. Ein frykta for både sitt eige og sin familien sitt liv.

Som med mange andre land i Aust-Europa gjorde innbyggjarane i landet opprør mot slutten av 1980-talet, men i Romania vart dette langt blodigare enn i dei andre landa. Dropen som fekk begeret til å flyte over var ordren Ceauşescu gav om skyte uvæpna demonstrantar i Timisoara. Dette eskalerte til den rumenske revolusjonen. Ceauşescu flykta med helikopter, men vart teke til fange og stilt for ein militærdomstol, tiltalt for m.a. folkemord. Etter ein summarisk rettargang vart ekteparet Ceauşescu avretta ved skyting den 25. desember 1989 i Târgovişte.

Ceausescu vart i 1980 tildelt St. Olavs orden av Kong Olav V. Ordenen vart trekt tilbake i 1989.

Kjelder[endre | endre wikiteksten]

Text document with red question mark.svg Denne artikkelen manglar kjelder eller referansar. Hjelp Wikipedia med å finna truverdige kjelder!