Anne Brit Skjæveland Sandberg
| Anne Brit Skjæveland Sandberg | |
| Statsborgarskap | Noreg |
| Fødd | 24. juli 1962 (62 år) Stavanger kommune |
| Idrett | friidrett |
| Tok del i | Sommar-OL 1992 |
Anne Brit Skjæveland Sandberg (fødd 24. juli 1962) er ein norsk tidlegare friidrettsutøvar frå Sandnes. Ho var ein allsidig utøvar som tevla i mangekamp, hekkeløp, høgdehopp og lengdehopp. Skjæveland Sandberg vart noregsmeister 11 gongar: 5 gongar i sjukamp og 3 gongar kvar i 100 meter hekk og lengdehopp. Ho var medlem i Sandnes IL, GSK Sandnes og IF Minerva.
Aktiv
[endre | endre wikiteksten]Enkeltøvingar
[endre | endre wikiteksten]Skjæveland fekk si fyrste medalje i hovudmeisterskapen i 1981 då ho vart nummer tre i høgdehopp. To år seinare tok ho ein ny NM-bronse, då i 100 m hekk. Så skulle det gå fire år før ho sanka fleire medaljar, i NM i friidrett 1986 vann ho sølv i både 100 m hekk og i høgdehopp. Det same gjorde ho i noregsmeisterskapen 1987, der ho i tillegg vann gullmedaljen lengdehopp. I NM i friidrett 1988 kneip Skjæveland gullmedaljen på korthekken, i høgdehopp enda ho på tredjeplass, jamhøgt med vinnarane av gull- og sølvmedalje. Året etter vart det gull og sølv i dei same to øvingane ved NM i Stjørdal.
7. juli 1990 presterte Skjæveland sitt livs høgste hopp på 1,85 meter i Handen i Sverige. Under noregsmeisterskapen 1990 i Moss i august månad vann ho fire medaljar: gull i 100 meter hekk, sølv i høgdehopp og sølv i lengdehopp, samt bronse på 400 m hekk. Sidan tok ho i 1991 NM-gull i lengde og sølv på korthekken, medan det i NM 1992 vart sølv i høgde- og bronse i lengdehopp.
Skjæveland var i sitt livs form sommaren 1992. Etter å ha sett norsk rekord i sjukamp på tampen av mai månad, gjorde ho 9. juni personbeste i lengdehopp med 6,30 meter i Oslo og 20. juni personbeste i 100 meter hekk med 13,43 sekund i Tønsberg. Etter ho gifta seg til etternamnet Sandberg vann ho i 1993 NM-gull i lengdehopp og sølv i 100 m hekk.
Mangekamp
[endre | endre wikiteksten]Skjæveland sette norsk rekord i sjukamp i 1980 med 5 025 poeng, ei tevlingsform som frå 1982 erstatta femkamp på meisterskapsprogramma. Ho vart norsk meister i sjukamp åra 1983, 1985, 1986, 1987 og 1990. Den 5. juli 1987 slo Skjæveland den tre år gamle noregsrekorden til Heidi Benserud i sjukamp. Ho sanka då 5 525 poeng i eit stemne i Madrid, fire veker seinare flytta ho rekorden til 5 540 poeng i Byrkjelo. Over seks veker i mai, juni, juli 1988 forbetra Skjæveland noregsrekorden til 5 568 poeng i Øyestad, 5 588 poeng i austerrikske Götzis og med eit jafs til 5 815 i danske Frederiksberg. Ho heva så rekorden til 5 902 poeng i Götzis-stemnet 1990. Same staden 30. og 31. mai 1992 presterte Skjæveland til 6 085 poeng. Den noregsrekorden vart ståande til Ida Marcussen sletta den med sine 6 226 poeng frå VM i friidrett 2007.
Skjæveland kom på 11. plass i sjukampen ved EM i friidrett 1990 med 5 853 poeng og på 22. plass under Sommar-OL 1992 i Barcelona, då med 5 869 poeng.
Kjelder
[endre | endre wikiteksten]Bakgrunnsstoff
[endre | endre wikiteksten]- «Anne Brit Skjæveland» (på engelsk). Olympedia. Henta 4. mars 2023.