Haim Oron

Haim Oron
Fødd	26. mars 1940 (83 år) Giv'atayim, Tel Aviv
Statsborgar av	Israel
Parti	Meretz-Yachad, Mapam
Yrke	politikar
Medlem	Hashomer Hatzair Peace Now

Haim «Jumas» Oron (fødd 26. mars 1940) er ein israelsk politikar og tidlegare landbruksminister. Han var leiar i det politiske partiet Meretz-Yachad, som han òg representerte i Knesset, den israelske nasjonalforsamlinga.

Foreldra hans emigrerte frå Polen før andre verdskrigen. Faren var tekstilarbeidar og mora husmor.

Etter militærtenesta i den israelske hæren, slutta Haim Oron og kona hans seg til ein kibbutz. Dei hadde fire barn, men eitt døydde tidleg i ei ulykke. Oron og kona bur framleis i kibbutz og løna hans som Knesset-medlem går inn i felleskassa på kibbutzen.

Oron vart i 1968 sekretær i den sosialistiske rørsla Hashomer Hatzair. Han var ein av grunnleggjarane av fredsrørsla Peace Now i 1978. I 1988 vart han innvald i Knesset for det venstresosialistiske partiet Mapam, som i 1992 gjekk saman med to andre grupper og vart til partiet Meretz, der han i 2008 vart vald til leiar.

Oron har òg vore kasserar i Histadrut, det israelske LO, og i 1999 vart han landbruksminister i Ehud Barak si regjering.

Oron er ein nær venn av palestinaren Marwan Barghouti, som sit i israelsk fengsel.

Kjelder

• Denne artikkelen bygger på «Haim Oron» frå Wikipedia på engelsk, den 3. januar 2009.