Nils Gulliksen Berg

Frå Wikipedia – det frie oppslagsverket
Hopp til navigering Hopp til søk

Nils Gulliksen Berg (21. januar 185217. desember 1926) var ein kartmålar, sakførar, politimann og stortingsmann frå Øvre Sandsvær i Buskerud. På Stortinget representerte han partiet Venstre.

Berg var son til ein arbeidar. Sjølv gjekk han 1871-73 underoffiserskulen i Kristiania, samstundes gjekk han på ein teikneskule. Tida 1874-84 arbeidde han på 'Det private oppmålingskontor' i hovudstaden. Han vart student i 1881 og cand. jur. i 1885. Frå 1885 til 1903 var han sakførar i Holmestrand, der han åra 1889-96 også var byingeniør. Ved sidan av var han 1891-93 redaktør av avisa Luren. Berg var med å stifte Holmestrand og Oplands Aktiebank, der han vart styreformann. Åra 1894-1901 var han medlem av bystyret. Frå 1903 til 1922 var han politimeister på Kongsberg. I 1909 vart han vald til leiar av landsforeininga til politimeistrane i Noreg, ein posisjon han hadde til 1922.

Berg var ved fleire høve leiar av ulike anleggsstyre, både under si tid i Holmestrand og på Kongsberg. Han leia utbygginga va telefonanlegget til Holmestrand og omland i 1889-90 og han leia bygginga av elektrisitetsverk for Kongsberg i tida 1911-22. Dessutan var han medlem av anleggsstyret for jarnbanen Holmestrand-Hvittingfoss.

Berg var Kongsberg og Hønefoss sin representant på Stortinget 1913-15. Han var då nestformann i protokollkomiteen, dessutan var han med i reguleringskomiteen. Perioden 1916-18 representerte han dei same to byane og i tillegg Notodden. Han var i 1916 nestformann i gasje- og pensjonskomiteen, dei to siste sesjonane var han medlem av justiskomite nr 2.

Han døydde i heimen sin på Kongsberg i 1926.

Kjelde[endre | endre wikiteksten]