Rolf Danneberg

Rolf Danneberg
Statsborgarskap	Tyskland
Fødd	1. mars 1953 (70 år) Hamburg
Idrett	friidrett
Tok del i	Sommar-OL 1988, Sommar-OL 1984

Rolf Danneberg (fødd 1. mars 1953) er ein tysk tidlegare friidrettsutøvar frå Hamburg som tevla for Vest-Tyskland. Han vann gullmedaljen i diskoskast under OL 1984 i Los Angeles med 66,60 meter. Fire år seinare fekk han bronsemedaljen i same øvinga under dei olympiske leikane i Seoul. Personleg rekord er på 67,60 m.

Aktiv

Danneberg vart vesttysk meister i diskoskast i 1980, men deltok ikkje i sommar-OL ettersom Vest-Tyskland boikotta leikane i Moskva. Han fekk sin internasjonale meisterskapsdebut to år seinare, utan å nå EM-finalen i Aten.

I 1984 vart Danneberg olympisk meister i diskoskast under leikane i Los Angeles. Halvvegs i finalen låg han utanfor medaljeplass, men fekk i fjerde omgang opp eit kast som målte 66,60 m. Dermed gjekk han opp i leiinga, 30 cm framom arrangørlandet sin eigen meister, Mac Wilkins. Kastet viste seg å halde til OL-gull.

Etter ein ellevteplass i EM 1986, stod Danneberg for betre prestasjonar i 1987-sesongen. I mai månad gjorde han sitt livs lengste kast med 67,60 m i Berlin. Tre månader seinare kom han på fjerdeplass under VM 1987, seks centimter frå bestekastet til bronsemedaljøren Luis Delís frå Cuba.

Under OL 1988 lukkast Danneberg å vinne ein ny OL-medalje. Etter ein mindre god serie smelte han til med 67,38 m i sitt femte forsøk og tok bronsemedaljen, berre 10 cm bak sølvmedaljøren sitt bestekast. To år etter vart Danneberg nummer seks i diskostevlinga i EM 1990.

Medaljar og plasseringar i internasjonale meisterskap

• EM 1982 i Aten: Utslått i kvalifiseringa
• OL 1984 i Los Angeles: Gullmedalje – 66,60 m, framom Mac Wilkins (66,30 m)
• EM 1986 i Stuttgart: Nr 11 – 61,60 m
• VM 1987 i Roma: Nr 4 – 65,96 m, bakom Luis Delís (66,02 m)
• OL 1988 i Seoul: Bronsemedalje – 67,38 m
• EM 1990 i Split: Nr 6 – 63,08 m

Kjelder

• Denne artikkelen bygger på «Rolf Danneberg» frå Wikipedia på tysk, den 13. september 2014.

Bakgrunnsstoff

• «Rolf Danneberg» (engelsk). olympedia.org. Henta 19. februar 2023.