Peter Syltebø
| Peter Syltebø | |||
| Fødd | 5. august 1883 Tresfjord | ||
|---|---|---|---|
| Død | 8. oktober 1970 (87 år) | ||
| Statsborgar av | Noreg | ||
| Alle verv |
| ||
Peter Ørger Pedersson Syltebø (5. august 1883–8. oktober 1970) var ein norsk gardbrukar og stortingsmann frå Tresfjord i Romsdal. Han representerte Møre fylke og partiet Venstre på Stortinget i tida 1934-45.
Syltebø var son til ein gardbrukar. Han gjekk Romsdals amtsskule 1900/01 og Treiders handelsskule i Kristiania 1902/03. Frå 1903 til -09 arbeidde han på ei handelsforretning i Tresfjord. I 1909 tok han over eit gardsbruk på Øvstedal i Tresfjord, og dreiv dette sidan. Jamsides var han frå same året revisor i Vestnes Sparebank, eit yrke han hadde i lang tid.
Åra 1913-31 var Syltebø medlem i heradsstyret i Tresfjord, ordførar 1919-31. Han var formann i fylkesskulestyret i Møre og Romsdal frå 1930 til han vart avsett av NS-styret i juli 1942. Innsett att som fylkesskulestyre-formann i mai 1945.
Hausten 1933 vart Syltebø vald inn på Stortinget for Venstre, attvald i 1936. Den fyrste treårsbolken var han medlem i Skog- og vassdragskomiteen, frå 1937 var han med i Finans- og tollkomiteen. Frå 1936 var han medlem i hovudstyret til Noregs vassdrags- og elektrisitetsvesen.
Kjelder[endre | endre wikiteksten]
- Stortingsbiografi Arkivert 2017-02-20 ved Wayback Machine.