Eberhard Vogel

Eberhard Vogel
Statsborgarskap	Tyskland, Den tyske demokratiske republikken
Fødd	8. april 1943 (80 år) Frankenberg
Idrett	fotball
Tok del i	Fotball under Sommer-OL 1964, fotball under Sommer-OL 1972, VM i fotball 1974

Eberhard Vogel (fødd 8. april 1943) er ein tysk tidlegare fotballspelar og -trenar frå Frankenberg i Sachsen. Vengspelaren deltok i 74 landskampar for Aust-Tyskland i tida 1962-76 og vann OL-bronse i 1972.

Klubbspel

Vogel spelte på FC Karl-Marx-Stadt frå 1961 til -70, der han i 1967 var med om å vinne den austtyske ligaen. Etter at laget frå Karl-Marx-Stadt rykte ned i 1970, flytta Vogel over til FC Carl Zeiss Jena og var aktiv i den klubben til han la opp i 1982. Med Carl Zeiss Jena sanka han tre nasjonale cup-pokalar (FDGB), etter to finalesigrar mot Dynamo Dresden og ein mot Rot-Weiß Erfurt. Våren 1981 tok Carl Zeiss Jena seg heilt til finalen i Cupvinnarcupen, undervegs eliminerte austtyskarane mellom andre AS Roma, Valencia CF og Benfica. I finalen vart det tap 1-2 mot Dinamo Tbilisi frå Sovjetunionen. Vogel spelte til saman 440 kampar i oberligaen i Aust-Tyskland, fleire kampar enn nokon annan spelar. Han skåra i alt 188 ligamål.

Landslagsspel

Vogel deltok i 74 landskampar i tida frå debuten mot Guinea i Conakry i desember 1962, til dess han vart teken av bana då Aust-Tyskland i april 1976 slo Algerie 5-0 heime i Cottbus. Han var innbytar i tre av kampane under Sommar-OL 1972 i Vest-Tyskland. I bronsefinalen mot Sovjetunionen utlikna han frå venstrevengen til sluttresultatet 2-2, eit oppgjer som enda med bronsemedaljar til begge laga. To år seinare var Vogel tilbake i Vest-Tyskland, der han var med i tre av VM-kampane til det austtyske mannskapet. Han skåra i alt 25 langslagsmål.

Merittar

• Finaletap i cupvinnarcupen: 1981 med Carl Zeiss Jena
• Austtysk seriemeister: 1967 med Karl-Marx-Stadt
• Austtysk cupmeister: 1972, 1974 og 1980 med Carl Zeiss Jena

Kjelder

• Denne artikkelen bygger på «Eberhard Vogel» frå Wikipedia på tysk, den 2. mai 2019.

• eu-football
• «Eberhard Vogel» (på engelsk). Olympedia. Henta 19. mars 2023.