Hei so dansa jento mi

Hei so dansa jento mi er ein springar med røter på Vestlandet. Slåtten er mest spela i Hordaland og var mykje nytta av Sjur Helgeland. Slåtten finst og i Sogn og i Valdres, der han til vanleg heiter Midt i myljo jul og Kyndismess. I Valdres har slåtten vore kjend i både Øystre og Vestre Slidre. Namna som er sett på springaren er knytt til slåttesteva. På Voss går stevet slik: Hei so dansa jento mi, sylvspende skor på føto di...

Slåtten er venteleg komen til Valdres frå Sogn.

Variantgruppa

I Hardingfeleverket har slåtten seks variantar under katalognummer 491. To av formene er frå Valdres, ein frå Sogn og dei tre siste frå Hordaland. Det finst og ein variant frå Valdres etter spelemannen Andreas Hauge, Hei for ei kjerring, ikkje teken med i lista. To av hordalandsformene skriv seg opphavleg frå Sjur Helgeland.

• a: Midt i myljo jul og kyndismess, etter Torleiv Bolstad, Øystre Slidre. Nedskrift Sven Nyhus 1974. Bolstad hadde slåtten etter Gudbrand Beitohaugen frå Øystre Slidre.

• b: Midt i myljo jul og kyndismess, etter Andris Dahle, Øystre Slidre. Nedskrift Sven Nyhus 1975. Dahle hadde slåtten etter bestefaren Ivar Ringestad frå Vestre Slidre.

• c: Springar, etter Sjur Berge, Balestrand. Nedskrift Arne Bjørndal 1916 (B 633). Berge lærte slåtten av Jens Fresvik frå Leikanger, Skrangle-Jens dei kalla, i 1864.

• d: Hei so dansa jento mi, etter Nils Eide, Granvin. Nedskrift Arne Bjørndal 1915 (B 410). Eide hadde slåtten etter Sjur Helgeland.

• e: Fyrkjeslåtten, etter Lars Rognved, Haus. Nedskrift Arne Bjørndal 1916 (B 1030b). Ei fyrkje er ei "stor førlemma kvinne" (Ivar Aasen).

• f: Hei so dansa jento mi, etter Lars Skjervheim, Vossestrand. Nedskrift Sven Nyhus 1974. Skjervheim lærte slåtten av Sjur Helgeland.