Katarina Johnson-Thompson

Katarina Johnson-Thompson
Statsborgarskap	Storbritannia
Fødd	9. januar 1993 (31 år) Liverpool
Idrett	friidrett
Tok del i	Samveldeleikane 2018, EM i friidrett 2018, Friidrett under Sommer-OL 2012 – Sjukamp damer, Friidrett under Sommer-OL 2016 – Sjukamp kvinner

Katarina Mary Johnson-Thompson (fødd 9. januar 1993) er ein britisk friidrettsutøvar frå Liverpool som tevlar i mangekamp, høgdehopp og lengdehopp. Ho vart verdsmeister i sjukamp i 2019 og 2023. I tillegg har ho vunne sølvmedaljen i sjukampen ved europameisterskapen 2018 og dei olympiske leikane 2024, samt sigra i femkampen i hall-EM 2015 og 2019 og hall-VM 2018.

Aktiv

Johnson-Thompson tok femteplassen i sjukamp ved verdsmeisterskapen 2013. Året etter vann ho meistermøtet i Götzis med 6 682 poeng. Same året i juli gjorde ho personleg rekord med eit lengdehopp på 6,92 meter ved eit DL-stemne i Glasgow. Våren 2015 sette Johnson-Thompson britisk rekord med 5 000 poeng då ho sigra i femkamp ved hall-EM i Praha, ho mangla 13 poeng på å tangere verdsrekorden.

Under dei olympiske leikane 2016 sette Johnson-Thompson under sjukampen britisk rekord i høgdehopp med 1,98 m, totalt i sjukampen enda ho på sjetteplass. I 2017 flytta ho sitt personbeste i sjukamp til 6 691 poeng i Götzis-stemnet og ho vart nummer fem i mangekampen ved verdsmeisterskapen i London. Mars månad 2018 sigra ho i femkamp ved hall-VM i Birmingham, ein større prestasjon gjorde ho då med 6 759 poeng tok andreplassen ved EM 2018 i Berlin.

I 2019 vann Johnson-Thompson meistermøtet i Götzis med endå eit personbeste, 6 813 poeng. Høgdepunktet i hennar idrettsliv kom då ho i byrjinga av oktober 2019 vann gullmedaljen i sjukampen ved verdsmeisterskapen i Doha og samstundes sette britisk rekord med 6 981 poeng.

Etter å ha vore plaga med skade i eit par seongar, kom Johnson-Thompson tilbake på høgt nivå i 2023. Ho gjekk heilt til topps i friidretts-VM 2023 i Budapest. Under Sommar-OL 2024 i Paris presterte ho sin beste sjukamp sidan ho presterte livsbeste i 2019. Med 6 844 poeng kom ho på andreplass i tevlinga, 36 poeng unna vinnaren Nafissatou Thiam sin poengsum.

Medaljar og plasseringar i internasjonale meisterskap

Johnson-Thompson under EM 2018

• OL 2012 i London: Nr 14 i sjukamp – 6 267 poeng
• VM 2013 i Moskva: Nr 5 i sjukamp – 6 449 poeng
• VM 2015 i Beijing: Nr 11 i lengdehopp – 6,63 m og nr 28 i sjukamp – 5 039 poeng
• OL 2016 i Rio de Janeiro: Nr 6 i sjukamp – 6 523 poeng
• VM 2017 i London: Nr 5 i sjukamp – 6 558 poeng og nr 5 i høgdehopp – 1,95 m
• EM 2018 i Berlin: Sølvmedalje i sjukamp – 6 759 poeng, bakom Nafissatou Thiam (6 816 poeng)
• VM 2019 i Doha: Gullmedalje i sjukamp – 6 981 poeng, framom Nafissatou Thiam (6 677 poeng)
• OL i 2021 i Tokyo: Braut sjukamp etter fire øvingar
• VM 2022 i Eugene: Nr 8 i sjukamp – 6 222 poeng
• VM 2023 i Budapest: Gullmedalje i sjukamp – 6 740 poeng, framom Anna Hall (6 720 poeng)
• EM 2024 i Roma: Braut sjukamp etter tre øvingar
• OL 2024 i Paris: Sølvmedalje i sjukamp – 6 844 poeng, bakom Nafissatou Thiam (6 880 poeng)

Kjelder

• World Athletics
• Denne artikkelen bygger på «Katarina Johnson-Thompson» frå Wikipedia på engelsk, den 12. oktober 2019.