Åkersongar

Frå Wikipedia – det frie oppslagsverket
Hopp til navigering Hopp til søk
Åkersongar

Status i verda: LC Livskraftig

Åkersongar Foto: J.M.Garg
Åkersongar
Foto: J.M.Garg
Systematikk
Rike: Animalia
Rekkje: Chordata
Klasse: Aves
Orden: Passeriformes
Familie: Acrocephalidae
Slekt: Acrocephalus
Art: A. agricola
Namn på andre språk
  • Engelsk: Paddyfield Warbler
  • Vitskapleg namn
    Acrocephalus agricola
    Jerdon, 1845

    Åkersongar (Acrocephalus agricola), er ein kjerrsongar som for tida er klassifisert i den nyleg skildra familien Acrocephalidae. Han hekkar hovudsakleg i temperert klima i Sentral-Asia, er flyttfugl som overvintrar grovt rekna i søraustlege Pakistan og i India.

    Skildring[endre | endre wikiteksten]

    Dette er ein brun til beigefarga songar med lysare underside, noko mindre enn slektningen som er vidt utbreidd i Noreg, sivsongar. Fjørdrakta til åkersongaren er jamt farga utan strekar, bortsett frå den lyse augebrynstripa. Fjørene er utsett for slitasje og bleiking gjennom hekkesesongen. Kroppslengda er ca. 13 centimeter og han har ei vekt på mellom 8 og 11 gram.[1]

    Åkersongar hekkar i ei rekkje av hovudsakleg fuktige habitat, ofte ved innsjøar og elvar. Habitata i vinterkvarteret er både lågtliggande og i fjelldalar, gjerne fuktige område med høge vekstar av busker, sukkerrøyr, takrøyr, ris eller starr. Her lever dei av insekt, inkludert artar av fluger, vårfluger, døgnfluger, maur, augestikkarar og biller, dessutan meitemark. Åkersongarane kan sitje både høgt og lågt i vegetasjonar medan dei snappar byttet, og kan gå ned til vassflata for å ta insekt.[1]

    Dei har ein mjuk melodiøs song som ofte er etterlikningar av andre artar. Kall for varsling og kontakt er meir skarpe og harde.

    Ein vestleg bestand som lever litt inn i Europa hekkar i vestlege Kasakhstan og vestover til sørlege Ukraina, Romania og Bulgaria. Desse fuglane overvintrar frå søraustre Iran til vestlege India. Elles finn ein arten i Sentral-Asia med overvintring på det indiske subkontinentet. Streiffuglar kjem sporadisk til Noreg, i perioden frå 2000 til 2015 var det rapportert i underkant av 20 observasjonar, dei fleste i Rogaland.[2]

    Storleiken på den globale populasjonen er ikkje kjent, men er rekna som minkande. Den europeiske bestanden er estimer til i ligge mellom 1,4 og 2,6 millionar individ.[3]

    Kjelder[endre | endre wikiteksten]

    Referansar
    1. 1,0 1,1 Dyrcz, A. (2016) Paddyfield Warbler (Acrocephalus agricola) In: del Hoyo, J., Elliott, A., Sargatal, J., Christie, D.A. & de Juana, E. (eds.) (2016). Handbook of the Birds of the World Alive. Lynx Edicions, Barcelona. Henta den 11. juni 2016
    2. Søk på artsobservasjoner.no den 11. juni 2016
    3. BirdLife International (2016) Species factsheet: Acrocephalus agricola. Henta frå http://www.birdlife.org den 11. juni 2016

    Bakgrunnsstoff[endre | endre wikiteksten]

    Commons-logo.svg Wikimedia Commons har multimedia som gjeld: Åkersongar