Hanne Haugland

Hanne Haugland
Statsborgarskap	Noreg
Fødd	14. desember 1967 (57 år) Haugesund kommune
Idrett	friidrett
Tok del i	Sommar-OL 2000, Sommar-OL 1996
Utmerkingar	Aftenpostens Gullmedalje, Bislett-medaljen, Porsgrunds Porselænsfabriks Ærespris, Sportsjournalistenes statuett

Hanne Birgit Haugland (fødd 14. desember 1967) er ein tidlegare norsk friidrettsutøvar frå Haugesund, som fyrst og fremst tevla i høgdehopp, men også i lengdehopp og tresteghopp. Perioden 1987-2000 deltok ho i mange internasjonale meisterskapar, det store høgdepunktet kom då ho vart verdsmeister i høgdehopp under VM 1997 i Athen. Mellom 1985 og 2000 vart ho noregsmeister 14 gongar, og vann elles tre NM-sølv og tre NM-bronser. Ho representerte etter rokes idrettslaga Haugesund IL, BUL, Vidar i Oslo og Minerva.

Aktiv

Haugland slo gjennom i 1985-sesongen, då ho tidleg i juni gjekk over 1,87 under eit stemne i Porsgrunn, det beste resultatet i Noreg den sesongen. Ho kom på bronseplassen under NM i Bærum med 1,78 m i høgde, same høgda som sølvvinnaren, og fekk også bronsen i lengdegropa etter 6,12 m, noko som var to centimeter bak den personlege rekorden. Året etter vann ho NM-gull i høgdehopp med same sluttresultat som året før, og fekk sølv for 6,08 m i lengdehopp. Ho forbetra sin personleg rekord i høgdehopp til 1,89 m under eit stemne i Birmingham.

Midt i mai 1987 sette Haugland i Oslo norsk rekord med 1,93 m. Sitt andre NM-gull vann ho då ho slutta på 1,81 m, same høgda nådde Anne Brit Skjæveland som grunna tidlegare riv måtte nøye seg med sølvmedaljen. Haugland deltok i slutten av august i sin fyrste internasjonale meisterskap, VM i friidrett 1987 i Roma. Her vart ho slått ut etter å ha stoppa på 1,85 m i kvalfiseringa.

I 1988 stoppa tre kvinner på 1,81 m under NM på Byrkjelo, atter kom Haugland før Skjæveland på resultatlista, men no vart det sølv og bronse på dei to, då Tone Svendby vart noregsmeister i øvinga. I 1989 vart Haugland dobbeltmeister i NM for fyrste gong, etter 1,84 m i høgdehopp og 6,18 m i lengdehopp. Dobbeltmeister vart ho også året etter i Fana, der ho vart tildelt kongepokalen for vinnarresultatet 1,90 m i høgdehopp. Ho kvalifiserte seg til EM-finalen i Split, der ho klarte 1,88 m og vart nummer åtte. Både i 1992 og 1993 vart ho noregsmeister i høgdehopp, på høvesvis 1,83 m og 1,85 m. Under VM i friidrett 1993 kom ho på delt niandeplass i høgdehopp.

Midtsommars 1994 svinga Haugland seg over 1,97 m og sette endå ein ny norsk rekord. Ho gjekk på ny over 1,90 m i NM-tevlinga og vann sin andre kongepokal, dessutan vart ho noregsmeister i tresteghopp med 13,56 m, åtte centimeter lenger enn den regjerande meisteren, Lene Espegren. I europameisterskapen i Helsingfors gjekk ho over 1,93 m i finalen og vart nummer fem på same høgda som bronsevinnaren.

Haugland vart i 1995 dobbeltmeister for fjerde gong i ein noregsmeisterskap. Ho var suveren i høgdehopp med 1,90 m, men hadde hard konkurranse frå Ingvild Larsen i lengdehopp. Haugland stoppa på heile 6,48 m, hennar aller lengste hopp nokon gong, Larsen nådde 6,41 m. Under VM i friidrett 1995 i Göteborg vart ho nummer seks i høgdehopptevlinga, med 1,96 m.

Ho stopppa på 1,96 m også då ho deltok i sommar-OL 1996 i Atlanta i Georgia, og kom med det på åttandeplass. To veker seinare, i Kristiansand, fekk Haugland sin tredje kongepokal etter 1,97 m i høgdehopp.

I august 1997 var Haugland i sitt livs form. 10. august vart ho verdsmeister med 1,99 m. Tre dagar etter ho vann VM-tittelen, gjekk ho i Zürich over 2,01, gjeldande norsk rekord også i 2012. Også det året vart ho tildelt kongepokalen under NM, då med 1,95 m i sluttprotokollen. Mest heile 1998-sesongen gjekk ho skadd.

År 1999 vann Haugland sitt tiande NM-gull i høgdehopp ,og sin femte kongepokal, med eit hopp på 1,94 m. Ho vart nummer 11 i VM i friidrett i Sevilla. Året etter tok ho sin ellevte og siste NM-tittel i høgdehopp med 1,90 m. Ho avslutta si tid som aktiv med å delta i OL i Sydney, men med 1,89 m i kvalfiseringa kom ho ikkje til finalen. Grunna skadeplager la ho opp etter 2000-sesongen, 32 år gammal.

Medaljar i norske meisterskap

• 1985: To bronsemedaljar; høgdehopp og lengdehopp
• 1986: Gull i høgdehopp, sølv i lengdehopp
• 1987: Gull i høgdehopp
• 1988: Sølv i høgdehopp, bronse i lengdehopp
• 1989: Gull i både høgdehopp og lengdehopp
• 1990: Gull i både høgdehopp og lengdehopp
• 1992: Gull i høgdehopp
• 1993: Gull i høgdehopp
• 1994: Gull i både høgdehopp og tresteghopp, sølv i lengdehopp
• 1995: Gull i både høgdehopp og lengdehopp
• 1996: Gull i høgdehopp
• 1997: Gull i høgdehopp
• 1999: Gull i høgdehopp
• 2000: Gull i høgdehopp

Medaljar og plasseringar i internasjonale meisterskap

• VM i friidrett 1987 i Roma: Utslått i kvalifiseringa (1,85 m)
• EM i friidrett 1990 i Split: Nr 8 – 1,89 m
• VM i friidrett 1993 i Stuttgart: Nr 9 – 1,88 m
• EM i friidrett 1994 i Helsingfors: Nr 5 – 1.93 m
• VM i friidrett 1995 i Göteborg: Nr 6 – 1,96 m
• Sommar-OL 1996: i Atlanta: Nr 8 – 1,96 m
• VM i friidrett 1997 i Aten: Gullmedalje – 1,99 m, framom Inha Babikova (Ukraina) og Olga Kaliturina (Russland), begge 1,96 m
• VM i friidrett 1999 i Sevilla: Nr 10 – 1,93 m
• Sommar-OL 2000 i Sydney: Utslått i kvalifiseringa (1,89 m)

Personlege rekordar og årsbeste i høgdehopp

År	1985	1986	1987	1988	1989	1990	1991	1992	1993	1994	1995	1996	1997	1998	1999	2000
Høgde	1,89	1,89	1,93	1,91	1,94	1,92	1,86	1,90	1,93	1,97	1,96	1,98	2,01	1,90	1,96	1,96

Ymse

Haugland er gift med høgdehopparen Håkon Särnblom. Både faren Terje Haugland og farfaren Eugen Haugland var framifrå friidrettsutøvarar.

Haugland vart i 1997 tildelt Aftenpostens Gullmedalje og Sportsjournalistenes statuett som «Årets idrettsnavn». Same året mottok ho Porsgrunds Porselænsfabriks Ærespris.

Kjelder

• Denne artikkelen bygger på «Hanne Haugland» frå Wikipedia på bokmål, den 25. august 2012.

• Denne artikkelen bygger på «Hanne Haugland» frå Wikipedia på engelsk, den 25. august 2012.

• Sportsboken, aktuelle årgangar

Bakgrunnsstoff

• (en) Hanne Haugland – Profil og resultatoversikt i olympiske konkurransar på sports-reference.com.
• (en) Hanne Haugland – Profil på nettsida til IAAF
• «Hanne Haugland» (på engelsk). Olympedia. Henta 3. mars 2023.