Laksefisk

Laksefisk er ein orden beinfisk som er utbreidd både i ferskvatn og saltvatn, hovudsakleg på den nordlege halvkula. Ein god del av artane er dessutan anadrome, det vil seie at dei gyter i ferskvatn men lever vaksenlivet sitt i havet. Mange av fiskane i gruppa er viktige både som mat- og sportsfisk.

Gruppa omfattar mange av dei viktigaste fiskeslaga i ferskvatn i Noreg. Av artar i ordenen kan me nemna laks, aure, røye, sik, lågesild og harr.

Kjenneteikn

Laksefisk vert rekna som relativt primitive beinfisk, m.a. sidan dei har bukfinnane langt bak og brystfinnane langt nede på kroppen. Fiskane i gruppa er stort sett spoleforma med ei viss grad av flattrykking frå sidene.

Laksefisk har feittfinnar mellom rygg- og halefinnane sine. Dette er eigentleg ikkje ekte finnar, men feittstrukturar som manglar finnestrålar og tener til å hindra danning av straumvirvlar og såleis hindra turbulens.

Dei største laksefiskane kan oppnå lengder på 150 cm og ei vekt på godt over 50 kg.

Kjelder

• Jonsson, Bror: «Laksefisker» i Norges dyr, Cappelen 1992
• FishBase