Andreas Haavoll

Andreas Haavoll 1869–1958 var ein bladmann, fødd i Ørsta på Sunnmøre.

Etter å ha bestått mellomskuleeksamen på Hambros skule i Bergen, tok han i 1888 til på Hamar Lærarskule. Eksamen tok han i 1890. I åra 1890-93 var han tilsett ved Sandsvær Sparebank i Kongsberg. Ved sidan av underviste han ved ein privatskule i Evju i Sandsvær. I denne tida tok han til å skrive for Kongsberg Blad. I åra som fylgde var han lærar i høvesvis Ulefoss, Eidskog og Langesund. I Langesund var han med å skipe Brevikposten, og leverte journalistisk stoff til avisa 1897-99.

I 1899 fekk han post som lærar i Kristiansund. Der vart han involvert i ein målstrid. Som ihuga nynorsk-forkjempar møtte han sterk motbør. Riksmålsmannen ”Jonas Hestnes og hans disiplar [laga] pipesjau åt meg i tre heile dagar”, sa han sidan om denne tilburda.

1910 flytta han til hovudstaden, då han gjekk inn som medeigar og forretningsførar for nynorskavisa "Den 17de mai". Då redaktøren Rasmus Steinsvik døydde i 1913, vart Haavoll bladstyrar. I åra fram til 1917 hadde han denne stillinga, stundom åleine, stundom saman med andre. Han trekte seg då ut av dette tiltaket.

Haavoll var ansvarleg utgjevar av Norsk Barneblad frå 1912. Frå 1916 heilt fram til 1956 var han redaktør av bladet. Dei to fyrste åra delte han stillinga med Arne Falk, åra 1949-54 med Øyvind Dybvad. Mest heile denne tida dreiv han Norsk Barneblads Forlag, som gav ut mange barnebøker på nynorsk.

Norskdomsmannen Haavoll var aktivt med i dei fleste nynorsk-tiltak i Oslo. Med tida vart han utnemnd til æresmedlem i Noregs Mållag, og i Det Norske Samlaget. I si tid, 1913, hadde han vore mellom skiparane av Det Norske Teatret.

Han var busett på Stabekk i Asker i Akershus.