Potetkake
Potetkake kan visa til ulike potetrettar forma som kaker. Det kan til dømes vera flate brød eller kaker laga med kokt potet i deigen, eller potetpannekaker av rivne poteter eller ulike typar omelett med potet.[1]
Potetkaker i ulike tradisjonar[endre | endre wikiteksten]
I Noreg kan «potetkake» vera eit anna namn for lompe,[2] men kan også visa til fleire typer steikte kaker av potet.[1] Dei kan brukast som tilbehøyr til hovudrettar som fisk eller saltmat eller som hovudrett med fyll som smør, ost, rømme, sukker eller anna.[3] I tidlegare tider var potetkaker mykje etne til kvardags.[4]
I Sverige er ei pannesteikt potetkake av riven potet, mjøl og mjølk kjend som raggmunk og rekna som landskapsrett i Östergötland. Dei kan etast med tyttebærsyltetøy og bacon. Ein variant steikt i langpanne er kjend som lufsa på Öland og råriven pannkaka i Småland.
Liknande rettar er mellom anna kjende i ulike mattradisjonar som tysk Kartoffelpuffer, jødiske latkes, russisk, kviterussisk og ukrainsk draniki, ungarsk tócsni, bulgarsk patatnik eller patetnik, som kan lagast med lauk og urter som mynte eller sar, og tsjekkisk bramborák eller cmunda, som kan lagast med kvitlauk, merian og karve. Draniki er ein kviterussisk nasjonalrett. Den sveitsiske nasjonalretten rösti eller röschti er kjenneteikna av at han ikkje inneheld egg eller mjøl.
I Australia og sentrale England er frityrsteikte potetkaker vanlege i fish and chips-sjapper. Dei er kjende som scallops, potato scallops, potato cakes, potato fritter eller potato pie. Små kaker laga av malne, rivne eller hakka poteter er kjende som hash browns i Storbritannia og Nord-Amerika. Flate, takkesteikte potetkaker er kjende som potato scones eller tattie scones i Skottland, fadge eller farls på Irland eller Lancashire potato cakes i England.[5] Desse kan serverast til frukost eller som ein smårett, og kan serverast saman med margarin, kvitlaukssmør, ketchup, baked beans eller eggerøre.[6] I Irland finst potetkake (potato cake, potato bread eller spid bread) laga av potetstappe og mjøl eller bakepulver og boxty, poundy eller potato bread laga av finriven rå potet.
Spansk tortilla de patatas er ein omelett laga med potet. Denne typen potetkake er også kjend i Italia som ei form for frittata.
Indisk aloo paratha er eit flatt brød laga ved å kjevla ut parathadeig med kokt potet inni.[7]
Kjelder[endre | endre wikiteksten]
- ↑ 1,0 1,1 Nokre døme: «Laks med salat og potetkake», frutimian.no; «Potetkaker», NRK Mat, nrk.no; «Potetkaker med eple- og karrisaus», vegetarmat.org; «Potetkake med røkt laks og lodderognkrem», trinesmatblogg.no; «Potetkaker», frukt.no «Stekt sei med potetkake, løk og bacon», godfisk.no.
- ↑ «potetkake» i Nynorskordboka.
- ↑ «Potetkaker, tradisjonsmat på ein ny måte!», Omvikdalen bygdekvinnelag «Potetkaker, lomper eller perrkokko«, bloggen Kvardagskost
- ↑ NRK (19. februar 2017), «Kari sine potetkaker», NRK, henta 9. september 2020
- ↑ «Traditional Scottish Recipes — Potato Scone». rampantscotland.com. Henta 12 September 2009.
- ↑ «How to cook the perfect tattie scones». The Guardian. Henta 9 January 2013.
- ↑ «Aloo Paratha», indianrecipes.lv
- Denne artikkelen bygger på «Potato cake» frå Wikipedia på engelsk, og «Potato pancake» frå Wikipedia på engelsk den 10. mai 2015.
Bakgrunnsstoff[endre | endre wikiteksten]
- Kari sine potetkaker. Oppskrift ved NRK.no