Bagrationovsk

Bagrationovsk Багратионовск
Byvåpenet til Bagrationovsk
Plassering
Styresmakter
Land	Russland
Føderasjonssubjekt	Kaliningrad oblast
Grunnlagd Bystatus	1325 1946
Geografi
Innbyggjarar  - Totalt (2008)	6 607
Koordinatar	54°23′00″N 20°38′00″E
Tidssone - Ved sommartid	EET (UTC+2) EEST (UTC+3)
Diverse annan informasjon
Postnummer	238420
Retningsnummer (tlf)	40156

Bagrationovsk (russisk Багратионовск, tysk Preußisch Eylau, litauisk Yluva eller Prūsų Ylava, polsk Pruska Iława eller Iławka) er ein liten by i det noverande Kaliningrad oblast i Russland, rundt 37 kilometer sør for Kaliningrad. Byen ligg rett ved grensa til Polen og har 6 607 innbyggere (2008). Byen heitte Eylau fram til 1946.

Den tyske riddarordenen bygde i 1325 ei borg på denne staden, og byen som voks opp rundt denne vart kalla Eylau.

Då Den tyske orden vart sekularisert i 1525, vart byen ein del av hertugdømet Preussen og fekk byrettar i 1585. Seinare vart området arva av Hohenzollarane og vart ein del av markgreveskapet Brandenburg i 1618. Byen vart ein del av Kongeriket Preussen i 1701 og administrert som ein del av provinsen Aust-Preussen frå 1773. Under den prøyssisk-leia tyske samlinga i 1871 vart området ein del av Det tyske keisardømet.

Det blodige slaget ved Eylau stod her 7.-8. februar 1807 mellom Napoleon sin La grande armée og dei russiske styrkane under kommando av Levin August von Bennigsen.

Under avslutninga av den andre verdskrigen rykka den raude arméen inn i byen våren 1945 og den tyske folkesetnaden som ikkje alt hadde flykta vart drive vestover. Byen vart omdøypt til dagens namn i 1946 til minne om den russiske generalen Pjotr Bagration som hadde delteke i slaget ved Eylau.

Kjelder

• Delar av denne artikkelen bygger på «Bagrationovsk» frå Wikipedia på bokmål, den 29. januar 2009.