Hans Ditlev Franciscus von Linstow
Hans Ditlev Franciscus von Linstow (4. mai 1787–10. juni 1851)[1] var ein dansk-norsk arkitekt som særleg er kjent for sitt hovudverk i Noreg; Det kongelege slott.
Han studerte teikning og måling ved Kunstakademiet i København på samme tid som han også studerte jus. Han avslutta studiene i København i 1812 og dro til Kongsberg kor han i åra 1812-1814 var elev ved Bergakademiet. Han avslutta ikkje ingeniøroffiserutdanninga, men studerte i stedet arkitektur attåt. Han arbeidde frå 1814 ved hoffet hans Kristian Fredrik og i tida 1815-1818 var han regimentskvartermeister og auditør ved det Akerhusiske ridende Jægerkors. I tida fram til 1820 var han brigadeauditør i kavaleriet og garnisonsauditør i Christiania.
Linstow ga undervisning, først i gipsklassen og i åra 1822-1840 i bygningslære ved Den kongelige tegneskole (Kunstakademiet) i Christiania. Han hadde vore ein av initiativtakerne til opprettinga av akademiet.[2]
[endre] Oppgåver
I 1823 fekk han oppgåva med å teikne slottet i Oslo og var med på å forme ut Slottsparken, med vaktstua til Garden. Han hjalp også venen Henrik Wergeland med bygginga av Grotten. I samtida vekte det undring då Linstow fekk oppgåva som arkitekt for slottet; han var ikkje utdanna arkitekt og hadde «ikke bygget så meget som et hundehus» i følgje J.C. Dahl.[2][1]
Slottet vert reist eit stykkje frå sjølve bybebyggelsen og Linstow la i 1838 fram plan for å knytte dette nærare saman med sjølve byen, noko som resulterte i den seinare Karl Johans gate. Gata fekk først namnet Slottsveien og Linstow så for seg bebyggelse med offentlege bygg på begge sider av gata og at tyngdepunktet i byen skulle ligge i denne gata fram mot Egertorget .
Linstow arbeide også ut mønsterteikningar for norske kyrkjer i åra 1828-1831 og rundt 80 kyrkjer blei reist med utgangspunkt i desse teikningane. Han arbeide også ut tilsvarande mønsterteikningar for prestegardar.
Linstow omkom i samband med ei vognulukke i 1851.[3]
[endre] Referansar
- ↑ 1,0 1,1 Hans von Linstow frå Weilbachs Kunstnerleksikon
- ↑ 2,0 2,1 Hans Ditlev Frantz Linstow frå Norsk Biografisk Leksikon
- ↑ Slottsbygger måtte dyrke grønnsaker frå Aftenposten
