Guri Vesaas
Guri Vesaas (fødd 13. januar 1939) er ei norsk forlagskvinne og omsetjar fødd i Vinje i Telemark. Ho var forlagsredaktør for Det Norske Samlaget si barnebokavdeling frå 1974 til 2006.
Vesaas har særleg vore oppteken av å gje ut barnebøker med kunstnarlege og litterære kvalitetar. Gjennom aktive initiativ har ho fått i stand samarbeid mellom ei rekkje forfattarar, illustratørar og biletkunstnarar. På den måten har ho vore med på å støtte biletboksjangeren i Noreg og skape moderne barnebokklassikarar. I 1974 hadde ho permisjon frå forlaget for å arbeide som redaksjonssekretær i barnebladet Maurtua. Under psevdonymet Hanna Midtbø har ho sidan 1976 omsatt omkring 50 barnebøker til norsk. Det oppdikta etternamnet Midtbø er knytt til barndomsheimen i Vinje.
[endre] Prisar
Vesaas har fått ei rekkje prisar for arbeidet sitt. I 1987 og 1996 mottok ho Noregs Mållag sin Nynorsk barnelitteraturpris og i 2000 deira Målprisen. I 1996 fekk Guri Vesaas NBU-prisen, I 2004 Grafill sin Ord & Bilde-prisen for å ha fremja den gode biletboka, og i 2005 fekk ho Norsk Oversetterforening sin Bastianprisen for sin omfattande verksemd som omsetjar. Då ho gjekk av med alderspensjon i desember 2006 vart ho heidra med forlaget si julebok for 2006: Hanna Midtbø alias Guri Vesaas, med helsingar frå kollegaer og forfattarar.
Året etter, i august 2007 vart ho utnemnt til riddar av 1. klasse av St. Olavs Orden for innsatsen sin for barne- og ungdomslitteraturen. Same året vart ho utnemnt til Årets nynorskbrukar, og mottok heidersprisen til Brageprisen som «nestoren innan norsk barnebokproduksjon, for hennar eineståande innsats for norsk barne- og ungdomslitteratur».
I 2010 vart Guri Vessas utnemnt til heidersmedlem i Noregs Mållag.
Guri Vesaas er dotter av forfattarane Halldis Moren Vesaas og Tarjei Vesaas og litlesyster til NRK-journalisten Olav Vesaas.
