Guri Vesaas
| Guri Vesaas | |
| Pseudonym | Hanna Midtbø |
| Nasjonalitet | Norsk |
| Fødd | 13. januar 1939 (74 år), i Vinje |
| Yrke | Forlagsredaktør, omsetjar |
| Sjanger | Barnelitteratur |
Guri Vesaas (fødd 13. januar 1939) er ei norsk forlagskvinne og omsetjar fødd i Vinje i Telemark. Ho var forlagsredaktør for Det Norske Samlaget si barnebokavdeling frå 1974 til 2006.
Vesaas har særleg vore oppteken av å gje ut barnebøker med kunstnarlege og litterære kvalitetar. Gjennom aktive initiativ har ho fått i stand samarbeid mellom ei rekkje forfattarar, illustratørar og biletkunstnarar. På den måten har ho vore med på å støtte biletboksjangeren i Noreg og skape moderne barnebokklassikarar. I 1974 hadde ho permisjon frå forlaget for å arbeide som redaksjonssekretær i barnebladet Maurtua. Under psevdonymet Hanna Midtbø har ho sidan 1976 omsett kring 50 barnebøker til norsk. Det oppdikta etternamnet Midtbø er knytt til barndomsheimen i Vinje.
Guri Vesaas er dotter av forfattarane Halldis Moren Vesaas og Tarjei Vesaas og litlesyster til NRK-journalisten Olav Vesaas.
Innhaldsliste |
Prisar[endre]
Vesaas har fått ei rekkje prisar for arbeidet sitt. I 1987 og 1996 mottok ho Nynorsk barnelitteraturpris frå Noregs Mållag og i 2000 fekk ho Målprisen. I 1996 fekk Guri Vesaas NBU-prisen, i 2004 Ord & Bilde-prisen frå Grafill for å ha fremja den gode biletboka, og i 2005 fekk ho Bastianprisen frå Norsk Oversetterforening for den omfattande verksemda som omsetjar. Då ho gjekk av med alderspensjon i desember 2006 vart ho heidra med forlaget si julebok for 2006: Hanna Midtbø alias Guri Vesaas, med helsingar frå kollegaer og forfattarar.
Året etter, i august 2007 vart ho utnemnt til riddar av 1. klasse av St. Olavs Orden for innsatsen sin for barne- og ungdomslitteraturen. Same året vart ho utnemnt til Årets nynorskbrukar, og mottok heidersprisen til Brageprisen som «nestoren innan norsk barnebokproduksjon, for hennar eineståande innsats for norsk barne- og ungdomslitteratur».
I 2010 vart Guri Vesaas utnemnt til heidersmedlem i Noregs Mållag.
Prisar og utmerkingar[endre]
- 1987: Nynorsk barnelitteraturpris for arbeidet med nynorsk barnelitteratur[1]
- 1989: Kyrkje- og undervisningsdepartementes omsetjarpris for samla omsetjargjerning
- 1996: Nynorsk barnelitteraturpris for omsetjinga av Martin og bestefar av Roberto Piumini[2]
- 1996: NBU-prisen
- 2000: Målprisen
- 2004: Ord & Bilde-prisen for å ha fremja den gode biletboka
- 2005: Bastianprisen for omsetjarverksemda hennar
- 2007: Årets nynorskbrukar
- 2007: Utnemnd til Riddar 1. klasse av St. Olavs Orden for innsatsen for barne- og ungdomslitteraturen
- 2007: Brageprisen: heidersprisen
- 2010: Heidersmedlem i Noregs Mållag
- 2012: Kulturdepartementes pris for barne- og ungdomslitteratur, omsetjarprisen for Rosas buss av Fabrizio Silei[3]
Referansar[endre]
- ↑ Ottar Grepstad (1998) «Nynorsk barnelitteraturpris» – i: Nynorsk faktabok 1998, s. 284 – Nynorsk forum.
- ↑ Nynorsk barnelitteraturpris. Noregs Mållag. Vitja 25. februar 2012.
- ↑ «Kulturdepartementets priser for barne- og ungdomslitteratur utgitt i 2012». Norsk Barnebokinstitutt (14. mars 2013). Vitja 21. mars 2013.
Bakgrunnsstoff[endre]
- Omsetjingar av Hanna Midtbø i digitalisert utgåve hjå Nasjonalbiblioteket
- Ord og bilde-prisen til Guri Vesaas
- Guri og Olav Vesaas om forfattarforeldra
- VG om pensjoneringa
- Guri Vesaas er Årets nynorskbrukar 2007 på http://www.aasentunet.no
- Utgjevingar av Guri Vesaas i BIBSYS Ask
- Utgjevingar av Hanna Midtbø i BIBSYS Ask
