Daudehavet

Frå Wikipedia – det frie oppslagsverket
Gå til: navigering, søk
Satellittbilete av Daudehavet.

Daudehavet (hebraisk Jam hammelaḥ - יַם הַמֶּֽלַח) er ein innsjø ved utlaupet av Jordanelva som ligg med om lag like store delar i Israel og Jordan. Daudehavet er kjent for sitt salthaldige vatn og som det lågaste naturlege overflatepunktet på jorda. Saltinnhaldet er av israelske ekpserter rekna til 31,5 % noko som er 9 gonger så høgt som i Middelhavet. Det høge saltinnhaldet gjer at det nesten ikkje finst liv i Daudehavet. Overflata ligg i dag om lag 410 m.u.h., mens den historiske normalen er 395 m.u.h..

Miljøtrussel[endre | endre wikiteksten]

Etter at vasstanden dei siste åra har gått sterkt ned, består Dødehavet no av to heilt separate delar. Tidlegare var det ei halvøy ved Al-Lisan. No er det turt land heile vegen. Berre eit lite bekkelaup er igjen og sørgjer for eit lite tilsig til den sørlege delen. I den nordlege delen er djupna opptil 400 meter, mens det i den sørlege berre er 4 meter.

Israel og Jordan søkjer internasjonal støtte til eit prosjekt for å redde området frå total utturking ved å føre inn havvatn ved hjelp av ein røyrleidning frå Raudehavet (Akababukta). Røyrleidningen vil bli 200 km lang og er kostnadsrekna til 800 millionar USD.

Turistmål[endre | endre wikiteksten]

Det spesielle miljøet ved Dødehavet har gjort området til eit reisemål for vanlege turistar, men også for helsereiser. Det salte vatnet kombinert med høg luftfukt, lufttemperatur og den spesielle solstrålinga 400 meter under havoverflata gjev spesielle forutsetningar for behandling av mellom anna psoriasis og andre hudsjukdomar. Dokumentasjonen for effekten av ei slik behandling er dårleg. Også norske pasientar vert sende på kur til Daudehavet.

Geologi[endre | endre wikiteksten]

Geologar meiner Jordandalen med Jordanelva, Genesaretsjøen (Galileasjøen/Tiberiasjøen) og Daudehavet vart danna for 8 millionar år sidan som følgje av ei forskyving i litosfæren mellom Den afrıkanske plata og Den indoaustralske plata. Forkastninga, som er 6 000 km lang, strekkjer seg frå Syria i nord gjennom Raudehavet, Eritrea, Djibouti, Etiopia, Uganda, Kenya, Rwanda, Burundi, Tanzania, Malawi og til Mosambik i sør.

Ein turist les avis mens han flyt på Daudehavet.

Kjelder[endre | endre wikiteksten]