Verran kommune

Verran kommune
Komm.nr.	1724
Fylke	Nord-Trøndelag
Adm.senter	Malm
Areal	601 km²
Folkemengd	2 648 (1. jan 2012)
Politikk
Ordførar (2011-)	Bjørn Skjelstad (Sp)
Målform	Nøytral
Nettstad	www.verran.kommune.no
Folketalsutvikling 1951-2010
Verran kommune på Commons

Verran er ein kommune i Nord-Trøndelag fylke som ligg langs fjordarmen Beistadfjorden inst i Trondheimsfjorden. Den grensar i nord mot Steinkjer og Namdalseid, i sør mot Inderøy, Leksvik og Rissa, og i vest mot Åfjord. Verran var opphavleg to kommunar, Malm og Verran, som vart slegne saman til éin kommune i 1964.

Kommunen er lang og smal. Total strandline er om lag 80 km. Det høgste fjellet i kommunen er Sandvassheia på 655 moh. Største tettstad er kommunesenteret Malm, der om lag 1 600 av av dei totalt 2 644 innbyggjarane bur. Andre tettstader er Follafoss, Verrastranda og Verrabotn.

Hovudnæringa i kommunen er industri, ein sektor der rundt halvparten av den yrkesaktive folkesetnaden er sysselsett. Andre store sektorar er handel- og servicenæringa, og jordbruksnæringa. Jernmalmgruvene i Malm vart drivne frå 1906 til 1997. Cellulosefabrikken Södra Cell Folla er den største arbeidsplassen i Follafoss.

I 2006 lova regjeringa tre millionar kroner til småsamfunnsprosjektet i Verran. Det var eit pilotprosjekt over fem år med ei ramme på seks millionar kroner, finansiert i felleskap av Kommunal- og regionaldepartementet, fylkeskommunen og kommunen. Målet var å stabilisere folketalet, setje fokus på trivsel og auke talet på robuste arbeidsplassar i kommunen.

Bakgrunnsstoff

• Kommunefakta (Nord-Trøndelag) - frå Statistisk sentralbyrå
• Verran kommune sine heimesider
• Artikkel frå Trønder-Avisa om ordførarbyte