Klaus Wolfermann

Klaus Wolfermann
Statsborgarskap	Tyskland
Fødd	31. mars 1946 Altdorf bei Nürnberg
Død	18. desember 2024 (78 år)
Idrett	friidrett
Tok del i	Sommar-OL 1968, Sommar-OL 1972
Utmerkingar	Silbernes Lorbeerblatt, Hall of Fame des deutschen Sports, Sportler des Jahres, Sportler des Jahres

Klaus Wolfermann (fødd 31. mars 1946) er ein tysk tidlegare friidrettsutøvar frå Altdorf bei Nürnberg som tevla i spydkast. Han vart olympiameister i øvinga under OL 1972 i München, og var tysk meister seks år på rad; 1969-74. Wolfermann var medlem SV Gendorf.

Aktiv

Wolfermann slo seg inn i verdseliten i spydkast i 1968, då han som best kasta 82,18 m. Han vart nummer to i den vesttyske meisterskapen bak Hermann Salomon, den beste vesttyske spydkastaren gjennom 1960-talet. Sesongen vart avslutta med OL-tur til Mexico, der han var langt unna å kvalifisere seg til finalen. Året etter, i 1969, vart han vesttysk meister framom førnemnde Salomon. Den store framgangen kom i 1970-sesongen, då han fleire gongar forbetra den vesttyske rekorden, sist til 86,46 m i september månad. Atter vart han vesttysk meister, noko han også vart i 1971. I 1971-sesongen nådde han 86,28 m, noko som gav han ein femteplass på årsstatistikken. Han vart nummer seks i europameisterskapen i Helsingfors.

I juni 1972 sette Wolfermann vesttysk rekord med 86,80 m i landskampen mellom Vest-Tyskland og Sovjetunionen i Augsburg. Han vart likevel klart slått av Jānis Lūsis, som vann med 89,38 m. Wolfermann auka den vesttyske rekorden til 87,20 m den 1. juli, nok ein gong i Augsburg. Midt i august la han på heile tre meter, til 90,40 m. Likevel var Lūsis den store favoritten til det olympiske spydgullet, ettersom han hadde sett verdsrekord med 93,80 m i Stockholm i juni. Den olympiske spydfinalen i München fann stad 3. september framom eit fullsett stadion, 75 000 tilskodarar. Lūsis opna med sterke 88,88 m i fyrste omgangen, og la på til 89,54 m i tredje omgang. Wolfermann låg på andreplassen etter 86,68 i fyrste omgang, og forbetra denne til 88,40 m i fjerde omgang. I femte omgang smelte han til med til med 90,48 m, ny olympisk rekord og vesttysk rekord. Lūsis svara i siste omgang med eit kjempekast, men 90,46 m var to cm for kort til å kapre gullmedaljen.

5. mai 1973 sette Wolfermann ny verdsrekord i spydkast med eit kast på 94,08 m i Leverkusen. Seinare i sesongen vann han spydkast-tevlinga i Europacupen for landslag, der han atter vart Lūsis sin overmann. Han tok elles sin femte strake vesttyske meistertittel, og året etter den sjette. Hans lengste kast i 1974-sesongen målte 88,26 m, berre finnen Hannu Siitonen kasta lenger, og under europameisterskapen i Roma i 1974 vart Wolfermann nummer fem.

I 1975 fekk Wolfermann si andre sølvmedalje i eit vesttysk meisterskap, bak den nye vesttyske meisterkastaren, Michael Wessing. Wolfermann makta ikkje å kvalifisere seg til Vest-Tysklands OL-tropp i 1976 og la opp i 1978.

Medaljar og plasseringar i internasjonale meisterskap

• OL 1968 i Mexico by: Utslått i kvalifiseringa (75,78 m)
• EM 1971 i Helsingfors: Nr 6 – 80,82 m
• OL 1972 i München: Gullmedalje – 90,48 m, framom Jānis Lūsis (90,46 m)
• EM 1974 i Roma: Nr 5 – 83,36 m

Kjelder

• Friidrott, aktuelle årgangar. Helsingborg
• Denne artikkelen bygger på «Klaus Wolfermann» frå Wikipedia på tysk, den 28. august 2012.

Bakgrunnsstoff

• Klaus Wolfermann Arkivert 2013-12-19 ved Wayback Machine. Olympics Sports Reference