Paul Breitner

Paul Breitner
	Paul Breitner i 2011
Personleg informasjon
Fullt namn	Paul Breitner
Fødd	5. september 1951 (75 år)
Fødestad	Kolbermoor i Vest-Tyskland
Høgd	176 cm
Posisjon	Midtbane, Forsvar
Seniorkarriere*
Landslag
	* Seniorklubbkampar og mål berre telt for nasjonal liga

Paul Breitner (fødd 5. september 1951) er ein tysk tidlegare fotballspelar frå Kolbermoor som representerte Vest-Tyskland i 48 landskampar. Han vart europameister 1972 og verdsmeister 1974 for Vest-Tyskland, samt ligameister med Bayern München i Vest-Tyskland og med Real Madrid i Spania.

Karriere

Klubbspel

Breitner spelte venstreback på det sterke Bayern München-laget frå 1970 til -74. Laget vann DFB-pokalen i 1971 og bundesliga 1972–74. I mai 1974 var han med å vinne europacupen ved å slå Atletico Madrid med 4–0 etter omkamp i finalen.

Sommaren 1974 vart han overført til Real Madrid mot tre millionar tyske mark. Dei neste tre sesongane gjorde han teneste for det spanske hovudstads-laget. I Real Madrid fekk han med seg den nasjonale dobbelt-triumfen i 1975, siger i liga og cup, og ein ligatittel nummer to i 1976. 1977/78 spelte han for Eintracht Braunschweig i bundesliga, då som speldrivar (playmaker) på midtbana.

Mot 1,75 millionar tyske mark vart Breitner overført til Bayern München sommaren 1978. Her fekk han ei sentral rolle på midtbana og var frå 1979 lagkaptein. I 1980 vann laget bundesliga for fyrste gong på seks år, ein triumf laget kopierte året etter. Våren 1982 vann FC Bayern DFB-pokalen etter 4–2 over FC Nürnberg. Derimot tapte laget europacupfinalen mot engelske Aston Villa med 0–1. Etter ein delvis skadeplaga sesong, la Breitner opp sommaren 1983.

Landslagsspel

Breitner fekk sin landslagsdebut 22. juni 1971 på Ullevål stadion i Oslo, ein privatlandskamp der gjestene slo vertane med 7 mål mot 1. Året etter vart han europameister då Sovjetunionen fekk stryk 0-3 i finalen i Brussel. Han spelte alle sju kampane under verdsmeisterskapen på heimebane i 1974. Gjennom turneringa skåra han tre mål, mellom anna utlikna han på straffespark i finalen mot Nederland.

29. april 1981 spelte Breitner sin 29. landskamp, fem-og-eit-halvt år etter den forrige. Verdsmeisterskapen 1982 i Spania deltok han i alle Vest-Tysklands sju kampar. I sin 48. og siste landskamp skåra han Tysklands trøystemål då Italia vann 3-1 i VM-finalen 1982 i Madrid. Skåringa var hans 10. i landslagsdrakta.

Merittar

Verdsmeister: 1974 for Vest-Tyskland
Europameister: 1972 for Vest-Tyskland
VM-sølv: 1982 for Vest-Tyskland
Vinnar av Europacupen: 1974 for Bayern München
Tysk ligameister: 1972, 1973, 1974, 1980 og 1981 for Bayern München
Vinnar av DFB-pokalen: 1971 og 1982 for Bayern München
Spansk ligameister: 1975 og 1976 for Real Madrid
Spansk cupmeister: 1975 for Real Madrid
Finalist i Europacupen: 1982 for Bayern München

Ymse

I 1981 vart Breitner kåra til Årets fotballspelar i Vest-Tyskland.

Kjelder

Denne artikkelen bygger på «Paul Breitner» frå Wikipedia på tysk, den 6. august 2026.

eu-football