Havørn

Havørn
Namn på andre språk
Nordsamisk	Mearragoaskin
Svensk	Havsörn
Dansk	Havørn
Engelsk	White-tailed Eagle
Tysk	Seeadler
Fransk	Pygargue à queue blanche, grand aigle de mer, aigle barbu
Spansk	Pigargo europeo
Russisk	Orlan-belokhvost (Орлан-белохвост)

Havørn (Haliaeetus albicilla) er den største rovfuglen i Nord-Europa. Som andre ørnar høyrer til han haukefamilien.

Havørn i fangenskap.

Skildring

Ungfuglen har svart og brun stjert med noko lyst i og svart nebb. Vaksne fuglar har kvit stjert og gult nebb. Begge kjønn har same utsjånad.

Havørna blir mellom 87 og 100 cm lang. Den vaksne hofuglen kan ha eit vengespenn på opptil 240 cm, medan hannfuglen er noko mindre. Ein fugl kan bli opptil 50 år gammal, men det er sjeldan.

Juvenil.

Levevis

Havørna lever av fisk og sjøfugl, men tek òg åtsel.

Ho byggjer store reir av kvister og greiner som ho forer med lyng, tang, mose og gras. Ofte bruker ørna same reir i fleire år. Ho legg egg mellom slutten av mars og mai. Dei to–tre egga blir ruga på i 35 til 45 dagar av begge foreldra.

Leveområde

Eldre havørnar held seg som oftast på ein stad, medan yngre fuglar streifar rundt omkring og trekkjer til dels sør- og vestover om vinteren.

I Noreg finst ørnane langs kysten frå Finnmark til Vest-Agder. Dei hekkar på øyar og holmar langs heile kysten, men mest i Nord-Noreg. Ifølgje Norsk Raudliste har talet på dyr vore veksande dei siste tretti åra, og bestanden på 4000–6000 reproduserande individ er rekna som robust. Utbygginga av vindmøller i hekkeområda har likevel medført fleire dødsfall.

Kjelder

• Søk i Rødlistedatabasen ved artsdatabanken.no.

Bakgrunnsstoff

• Foto av havørn

Commons har multimedia som gjeld: Havørn