Måsefamilien
| Måsefamilien | |
.jpg)
| |
| Systematikk | |
| Rike: | Dyr Animalia |
| Rekkje: | Ryggstrengdyr Chordata |
| Underrekkje: | Virveldyr Vertebrata |
| Klasse: | Fuglar Aves |
| Overorden: | Neoaves |
| Orden: | Vade-, måse- og alkefuglar Charadriiformes |
| Underorden: | Lari |
| Familie: | Måsefamilien Laridae Vigors, 1825 |
| Underfamiliar | |
| Anoinae Gyginae Larinae Rynchopinae Sterninae | |
Måsefamilien, Laridae, er ein biologisk familie av måsar, terner og saksenebbar som tilhører ordenen vade-, måse- og alkefuglar. Artane i familien førekjem over heile verda, men i liten grad ved Antarktis. Mange artar i familien er kystfuglar, men nokre artar lever i innlandet, i elvar, innsjøar og på våtmarker, men somme er òg periodevis knytt til menneske. Dei to måsane i slekta Rissa, krykkje og raudfotkrykkje, samt sabinemåse kan treffast på opent hav.
Artane i denne familien har symjehud på føtene og nebbet manglar cere, vokshud på overnebbet. Nasebora er på eller over midten av nebbet. Horndekket på nebbet er ikkje delt slik som hos stormfuglar. I absolutt eit fleirtal av artane er kjønna like. Fjørdrakta hos dei fleste artene av terner og måsar er vanlegvis hovudsakleg kvit og grå med innslag av svart, men somme har mørke fjørdrakter. Sommardrakter vil ofte avvike frå vinterdrakta. Ungfuglar har varierande grad av spraglete brun og grå fjørdrakt.
Oversyn over slekter
[endre | endre wikiteksten].jpg)
Måsefamilien (Laridae), underfamiliar og slekter i rekkjefølgje etter IOC World Bird List V13.1, 2023,[1] med norske artsnamn etter Norske navn på verdens fugler.[2] Underfamiliar er etter HBW and BirdLife Taxonomic Checklist.[3]
Anoinae, noddyar
- Slekt Anous, fem tropiske noddyar, verdsomspennande distribusjon
Gyginae, silketerne
- Slekt Gygis, silketerne, Gygis alba, lita, kvit terne med utbreiing på øyar i tropiske hav
Larinae, måsar
- Slekt Creagrus, svalestjertmåse, Creagrus furcatus, endemisk for Galapagosøyane
- Slekt Rissa, krykkje langs kystar av nordlege Atlanterhavet og Stillehavet, samt raudfotkrykkje i Beringhavet
- Slekt Pagophila, ismåse, Pagophila eburnea, sirkumpolar i Arktis, på pakkis eller ved kanten
- Slekt Xema, sabinemåse, Xema sabini, sirkumpolar i Arktis
- Slekt Chroicocephalus, elleve relativt små måsar, dei fleste med hette. Slekta er vidt distribuert i alle verdsdelar unntatt Antarktis
- Slekt Hydrocoloeus, dvergmåse, Hydrocoloeus minutus, oppstykka leveområde i Eurasia inkludert vestlege og sørlege Europa. Avgrensa i N-Amerika
- Slekt Rhodostethia, rosenmåse, Rhodostethia rosea, lever i arktis, nordlege Amerika, Grønland og nordaustlege Sibir
- Slekt Leucophaeus, fem måseartar i «den nye verda», fleire med relativt mørk fjørdrakt
- Slekt Ichthyaetus, seks måsar i «den gamle verda»
- Slekt Larus, 24 store kvithovuda måsar, vidt spreitt, dei fleste på den nordlege halvkula, alle dei vanlege måseartane i Noreg er Larus-måsar: svartbak, sildemåse, gråmåse, fiskemåse
Rynchopinae, saksenebbar
- Slekt Rynchops, tre artar saksenebbar, terneliknande fuglar i tropisk og subtropisk Amerika, Afrika og Sør-Asia
Sterninae, terner
- Slekt Gelochelidon, to store terner: sandterne, G. nilotica er sirkumpolar og sumpsandterne, G. macrotarsa finst i Australia
- Slekt Hydroprogne, rovterne, Hydroprogne caspia, nest største ternearten, sirkumpolar nær tropane, hekkar i tempererte område
- Slekt Thalasseus, åtte terneartar med fjørtopp, verdsomspennande utbreiing, inkluderer splitterne
- Slekt Sternula, sju artar av små terner
- Slekt Onychoprion, fire tropiske artar, fleire med mørk overside, ein art beringterne hekkar langs kysten av Alaska og Nordaust-Sibir
- Slekt Sterna, 13 vidt spreidde artar typiske terner, inkluderer raudnebbterne, makrellterne, rosenterne
- Slekt Chlidonias, ferskvassartar, fire svartterner med mørke område i fjørdrakta, og ei lysare, maoriterne
- Slekt Phaetusa, tjukknebbterne, Phaetusa simplex, ei stor terne i og rundt Amazonasbassenget
- Slekt Larosterna, inkaterne, Larosterna inca, ei mørk terne ved kysten av Chile og Peru
Kjelder
[endre | endre wikiteksten]- Denne artikkelen bygger på «Måsfåglar» frå Wikipedia på svensk, den 30. november 2014.
Referansar
[endre | endre wikiteksten]- ↑ Gill, Frank; Donsker, David; Rasmussen, Pamela, red. (January 2023). «Hummingbirds». IOC World Bird List Version 13.1. International Ornithologists' Union. Henta 6. juli 2023.
- ↑ Norsk navnekomité for fugl (NNKF). «Norske navn på verdens fugler». Birdlife Norge. Henta 6. juli 2023.
- ↑ «HBW and BirdLife Taxonomic Checklist». BirdLife Data Zone (version 7 utg.). BirdLife International. Desember 2022. Henta 6. juli 2023.
Bakgrunnsstoff
[endre | endre wikiteksten]
Wikimedia Commons har multimedia som gjeld: Måsefamilien