God Only Knows

«God Only Knows» Singel av The Beach Boys frå albumet Pet Sounds
A-side	«Wouldn't It Be Nice»
Språk	engelsk
Utgjeve	11. juli 1966
Innspelt	Western Studios 10. mars 1966 Columbia Studios 10. mars 1966 11. april 1966
Sjanger	Barokk pop
Lengd	2:49
Selskap	Capitol (#5706)
Komponist	Brian Wilson
Tekstforfattar	Tony Asher
Låtskrivar(ar)	Brian Wilson, Tony Asher
Produsent	Brian Wilson
The Beach Boys-kronologi
«Sloop John B» (1966	«God Only Knows»	«Good Vibrations» (1966)

«God Only Knows» er ein song av det amerikanske popbandet The Beach Boys. Songen er det åttande sporet på albumet deira Pet Sounds frå 1966 og ein av dei mest kjende songane deira. «God Only Knows» vart skriven og produsert av Brian Wilson, med tekst av Tony Asher og solovokal av Carl Wilson.

Songen vart gjeven ut som B-sida til «Wouldn't It Be Nice» i USA. I Europa var dei to sidene snudd om, og «God Only Knows» fungerte som A-side. Her nådde han mellom anna andreplass i Storbritannia og sjetteplass i Noreg.

Songen var banebrytande på mange måtar. Han var den første kommersielle popsongen med ordet «God» eller «Gud» i tittelen. Songen var mykje meir teknisk sofistikert enn noko anna både Beach Boys og andre popgrupper hadde gjort til då, særleg den kompliserte melodiske strukturen og vokalharmoniane. Som produsent nytta Brian Wilson òg mange uvanlege instrument for sjangeren, som cembalo og valthorn som ein kan høyre i introduksjonen.

Magasinet Mojo rangerte songen på 13. plass på lista deira over dei største songane gjennom tidene. Pitchfork Media utropte songen til den beste songen frå 1960-åra. Songen er på 25. plass på lista til musikkmagasinet Rolling Stone over dei 500 største songane gjennom tidene.

Låtskriving

Brian Wilson har forklart i sjølvbiografien sin Wouldn't It Be Nice: My Own Story at melodien til «God Only Knows» var inspirert av ein John Sebastian-song han hadde høyrt ein del på. Opningstemaet spelt av valthorn er særs likt temaet i Akt 2 Scene 2, «Hagen-teamet» i Richard Wagner sin Die Götterdämmerung, som òg vert spelt av valthorn.

Tony Asher var sikker på at songen kom til å verte ein stor hit, fordi han meinte melodien var så vakker. Han var derimot usikker på om han kunne klare å skrive ein tekst som var på same nivå. Han var villig til å kjempe for opningslinja, «I may not always love you», som var ein uvanleg måte å starte ein kjærleikssong på.

«God Only Knows» var ein av dei første popsongane som nytta ordet «Gud» i tittelen. Wilson frykta at songen ikkje ville verte spelt på radio på grunn av dette, men Wilson og Asher valde likevel å ha tittelen slik.

Val av vokalist

Brian Wilson hadde opphavleg tenkt å synge songen sjølv, men lét til slutt broren Carl Wilson få æra, sidan han meinte Carl kunne få bodskapen tydelegare fram. Carl Wilson har seinare sagt at han følte seg utruleg heldig som fekk høve til å synge «God Only Knows». Brian bad han synge songen så enkelt som mogeleg.

Bruce Johnston har forklart at Brian Wilson arbeidde særs mykje med «God Only Knows» og hadde på eit tidspunkt alle i The Beach Boys, Terry Melcher, kona si og systera hennar, på vokal. Etter kvart fann Wilson ut at han trengde å strippe songen ned att, og enda opp med å berre nytte tre korstemmer, Bruceh Johnston med den lysaste stemma, Carl Wilson i midten og Brian sjølv på den lågaste stemma.

Innspeling

Akkompagnementet til songen vart spelt inn 10. mars 1966 ved Western Recorders i Hollywood California. Musikarar på denne innspelinga var Hal Blaine på trommer, Jim Gordon på perkusjon, Lyle Ritz på kontrabass, Carol Kaye på bassgitar, Ray Pohlman på danelectro-bass, Don Randi på piano, Larry Knechtel på orgel, Carl Fortina og Frank Morocco på trekkspel, Leonard Hartman på klarinett, og bassklarinett, Bill Green og Jim Horn på fløyte, Alan Robinson på valthorn, Jay Migliori på barytonsaksofon, Leonard Malarsky og Sid Sharp på fiolin, Darrel Terwilliger på bratsj og Jesse Erlich på cello.

I følgje Brian Wilson var det 23 musikarar til stades på innspelinga, men berre 16 er nemnde på opptaket som vart nytta til slutt. 23 musikarar på ein popsong var eit særs høgt tal i dei dagar. Alle musikarane spelte samstundes og danna eit rikt lydbilete.

Vokalen vart spelt inn mellom mars og april 1966 i Columbia Studios i Hollywood.

Ettermæle

I tillegg til magasina som har plassert songen høgt på listene over dei største songane gjennom tidene eller på 1960-talet, har Paul McCartney uttrykt sin kjærleik til songen.

Bono sa i oktober 2006 då Brian Wilson vart innlemma i UK Music Hall of Fame at strykarrangementet på «God Only Knows» er eit bevis på at det finst englar.

I ei avstemming på musikkanalen Vh1 vart songen plassert på 28. plass på ei liste over britane sin favorittekst Han vart stemnd fram av lyttarane på BBC Radio 2 som ein av tr esongar som kan endre liva til folk.

Medverkande

• Hal Blaine — trommer
• Jesse Erlich — cello
• Carl Fortina — trekkspel
• Jim Gordon — perkusjon
• Bill Green — fløyte
• Leonard Hartman — klarinett, bassklarinett
• Jim Horn — fløyte
• Bruce Johnston — korvokal
• Carol Kaye — elektrisk bass
• Larry Knechtel — orgel
• Leonard Malarsky — fiolin
• Jay Migliori — barytonsaksofon
• Frank Morocco — trekkspel
• Ray Pohlman — elektrisk bass
• Don Randi — piano
• Lyle Ritz — kontrabass
• Alan Robinson — valthorn
• Sid Sharp — fiolin
• Darrel Terwilliger — bratsj
• Brian Wilson — korvokal
• Carl Wilson — solovokal, korvokal

Andre utgåver

Andre artistar som har spelt inn songen er mellom andre Glen Campbell, Jack Jones, Claudine Longet, Andy Williams og Neil Diamond, David Bowie samt fleire andre.

• Elvis Costello and the Brodsky Quartet på The Juliet Letters frå 1993.
• Brenda & the Tabulations på Dry Your Eyes frå 1967
• P.P. Arnold på Kafunta frå 1968
• Claudine Longet på Let's Spend the Night Together frå 1972
• Mandy More på But That Is Me frå 1972
• Captain & Tennille på Love Will Keep Us Together frå 1975
• David Bowie på Tonight frå 1984.
• Neil Diamond på I'm Glad You're Here With Me Tonight frå 1977.
• Charly Garcia og Pedro Aznar på Tango 4 frå 1991.
• Judie Tzuke på Left Hand Talking frå 1991.
• Justin Hayward på Classic Blue frå 1994.
• The Real Group på Nothing But the Real Group frå 1994.
• The Manhattan Transfer på Tonin' frå 1995.
• Betty Everett på Happy Endings frå 1975.
• Olivia Newton-John på If You Love Me, Let Me Know frå 1974.
• The Nylons på Run for Cover frå 1996.
• Jars of Clay på Front Yard Luge (1999)
• Brian Wilson på konsertalbumet Live at the Roxy Theatre frå 2001.
• Elton John, om lag 2001.
• The Vogues på samlealbumet Memories/Sing the Good Old Songs (2001)
• Brian Wilson på konsertalbumet Pet Sounds Live (2002).
• John Wetton på Rock of Faith (2003)
• Holly Cole på Shade frå 2003.
• Mandy Moore og Michael Stipe på filmmusikken til Saved! i 2004.
• Jonatha Brooke på Back in the Circus i 2004.
• Kim Kuzma Who You Are i 2005.
• Giant Drag omkring 2006
• Petra Haden omkring 2006
• John Pizzarelli på Knowing You (2006)
• Switchfoot (2006)
• Daniel Johnston på Do It Again : A Tribute to Pet Sounds (2006)
• Geoff Gascoyne ft. Jamie Cullum på Keep It to Yourself (2006)
• Luciana Souza på The New Bossa Nova (2007)
• Joss Stone på Introducing Joss Stone (2008)
• Wayne Hussey på Bare (2008)
• The Mockers på Mojo Presents In My Room (2007)

Kjelder

• Denne artikkelen bygger på «God Only Knows» frå Wikipedia på engelsk, den 31. august 2009.
  • Wikipedia på engelsk oppgav desse kjeldene:

12:  «Superstition»  Stevie Wonder

Plassering på lista til Rolling Stone frå 2021 over dei 500 beste songane gjennom tidene 11 «God Only Knows»  The Beach Boys

10:  «Hey Ya!»  Outkast

26:  «(Sittin on) the Dock of the Bay»  Otis Redding

Plassering på lista til Rolling Stone frå 2010 over dei 500 beste songane gjennom tidene 25 «God Only Knows»  The Beach Boys

24:  «People Get Ready»  The Impressions