Orsa kommun

Orsa kommun
Kommunevåpenet til Orsa kommun
Len	Dalarnas län
Landskap	Dalarna
Centralort	Orsa
Areal	1 808,13 km²
– Landareal	1 742,27 km²
– Vassareal	65,86 km²
Folketal	7 091
Folketettleik	4,07/km²
Kommunenummer	2034
Nettside	www.orsa.se
Kart

Orsa kommun er ein kommune i Dalarnas län i Sverige. Kommunen grensar til to andre kommunar i Dalarnas län, Rättviks kommun i aust og Mora kommun i sør og vest. I tillegg grensar kommunen til Ljusdals kommun i Gävleborgs län i nord og Härjedalens kommun i Jämtlands län i nordaust. Administrasjonssenteret i kommunen er Orsa, som ligg 15 km nord for Mora.

Nord i Orsa kommun finn ein mykje furuskog i næringsfattig morenejord, men i sør er det ein meir fruktbar og artsrik sedimentberggrunn, mellom innsjøane Skattungen og Orsasjön. Det er også mykje myrmark i kommunen. Næringslivet er dominert av treindustri og turisme. Ein kjend attraksjon i kommunen er Orsa Grönklitt, som er eit skisenter og ein bjørnepark.

Administrativ historikk

Orsa kommun omfattar i dag det same området som ved innføringa av kommunar i 1863. Administrasjonssenteret Orsa var municipalsamhälle frå 1902 til 1966.

Kommunevåpenet

Blasonering: På gullbakgrunn, tre raude orsaslipesteinar, to øvst og éin nedst.

Slipesteinproduksjon har føregått svært lenge i området og slipesteinen finst òg på eit soknsegl frå 1720. Våpenet vart fastsett av kongen i 1943. . Det vart ikkje gjort nokon endringar i kommunen i samband med inndelingsreformene på 1950- og 1970-talet, men våpenet vart registrert hjå Patent- och registreringsverket ifølgje dei nye reglane for kommunevåpen i 1974.

Tettstader

Det er to tettstader i Orsa kommun.

Tettstadene i tabellen er ordna etter innbyggjartal per 31. desember 2005. Administrasjonssenteret er utheva.

Nr.	Tettstad	Folketal
1.	Orsa	5 278
2.	Skattungbyn	266

Kjelder

• Artikkelen var opphavleg basert på ei omsetjing av «Orsa kommun» på Wikipedia på svensk.
• «Orsa» på Store Norske Leksikon.