Bokn kommune

Bokn kommune
Komm.nr.	1145
Fylke	Rogaland
Adm.senter	Føresvik
Areal	47 km²
Folkemengd	858 (1. jan 2012)
Politikk
Ordførar (2007-)	Kyrre Lindanger (Ap)
Målform	Nynorsk
Nettstad	www.bokn.kommune.no
Folketalsutvikling 1951-2010
Bokn kommune på Commons

Bokn kommune ligg i Rogaland fylke i regionen Haugalandet og grensar i aust til Finnøy, i sør til Rennesøy og Kvitsøy, i nord til Tysvær og i vest til Karmøy. Kommunen vert utgjort av tre øyar der det bur folk, og i tillegg 123 småøyar og holmar. På øya Vestre Bokn bur det mest folk, og nokre mindre på øyane Austre Bokn og Ognøy.

Kommunesenteret er Føresvik.

Samfunn

Mot Føresvik

Av næringsvegar har kommunen ein del jordbruk, men har òg viktige føretak som Bokn Plast og fiskemottak.

Bokn har eige bibliotek og matvarebutikkar. Kommunen har éin skule, Bokn skule, som er både barne- og ungdomsskule med om lag 120 elevar. Tilknytta skulen finn ein òg Bokn barnehage.

Geografi

Bokn har brusamband mot resten av Haugalandet og nord-Rogaland og ferjesamband mot sør over Boknafjorden. Sambandet er ein del av Europaveg 39, ein del av hovudvegen mellom Bergen og Stavanger.

Høgaste punkt er Boknafjellet 294 moh på Vestre Bokn. Fjelltoppen har vore lett å kjenna att og orientera seg etter på sjøen. Namnet Bokn skal tyda seglingsmerke.

Kommuneblom og -våpen

Kommuneblomen til Bokn er kusymra, som lokalt gjerne blir kalla kusom. Blomen vart kåra i ei avstemming.

Kommunevåpenet vert skildra som «Varde i sølv på blå botn». Blåfargen symboliserer at kommunen er ein øykommune med hav kring. Sølvfargen symboliserer rikdomane i havet. Varden symboliserer øyane slik ein kan sjå dei på litt avstand.

Kjente folk frå Bokn

• Daniel Danielson Grønnestad
• Asbjørn Kloster
• Lars Elisæus Vatnaland

Bakgrunnsstoff

• Bokn Bygdablad
• Kommunefakta Rogaland frå Statistisk Sentralbyrå