Vegard Opaas

Frå Wikipedia – det frie oppslagsverket
Hopp til navigering Hopp til søk
Vegard Opaas
Statsborgarskap Noreg
Fødd 11. januar 1962
Oslo
Idrett skihopping
Yrke skihoppar

Vegard Opaas (fødd 11. januar 1962) er ein tidlegare norsk skihoppar frå Oslo. Han hadde sin beste sesong i 1987, då han som fyrste nordmann gjekk til topps i verdscupen samanlagt. Same sesongen vann han to sølvmedaljar og ein bronsemedalje under ski-VM i Oberstdorf. Han vart noregsmeister ein gong (1986) og vann elles ein NM-sølv og to NM-bronsar i tida 1984-87, alle i storbakkerenn.

Aktiv[endre | endre wikiteksten]

Opaas debuterte i verdscupen i januar 1982 med ein tiandeplass i St. Moritz. Det store gjennombrotet kom to sesongar seinare, då han midt i desember 1983 vann storbakkerennet i Thunder Bay. Han fekk då plass i OL-troppen, og vart nummer åtte som best. Samanlagt i verdscupen vart han nummer 10. I 1985 var han med til ski-VM i Seefeld, men hoppa svakt. I 1986-sesongen hoppa Opaas seg opp på pallen i tre renn i verdscupen, totalt i verdscupen vart han nummer sju. Under noregsmeisterskapen i stor bakke i Holmenkollen vann han sin einaste gullmedalje, med 232,5 poeng slo han Rolf Åge Berg med 0,2 poeng.

Sesongen etter, 1986/87, vann Opaas verdscupen i skihopping. Han sikra seg fire sigrar i verdscuprenn, og ei rekke pallplasseringar. Espen Bredesen i 1994 og Anders Bardal i 2012 er dei andre nordmennene som har makta vinne verdscupen. Same sesongen vann Opaas tre medaljar under verdsmeisterskapen i Oberstdorf. Han tok bronsemedaljen i normalbakken, sølvmedaljen i storbakken, og var med på å sikre Noreg sølv i lagkonkurransen, dei andre på laget var Ole Christian Eidhammer, Hroar Stjernen og Ole Gunnar Fidjestøl. Jiří Parma og Andreas Felder vann kvar sitt av dei individuelle renna, med store marginar. Tidlegare i sesongen kom Opaas på andreplass i den tysk-austerrikske hoppveka, bak Ernst Vettori.

Opaas vart i OL-sesongen 1988 nr 12 i verdscupen. I nokre renn hevda han seg mellom dei aller beste, men hamna oftare langt nede på resultatlistene. Han fekk plass i OL-troppen, men misluktest i stobakken. 1989-sesongen likna på den førre, endå om han vann eit verdscuprenn i Lake Placid.

Han la opp skihoppinga i 1990.

Besteplasseringar i internasjonale meisterskap[endre | endre wikiteksten]

  • 1984: Nr 8 i normalbakken under vinter-OL i Sarajevo
  • 1987: Sølv i storbakken, bronse i normalbakken og sølv i laghopp under ski-VM i Oberstdorf
  • 1988: Nr 19 i storbakken i vinter-OL i Calgary

Besteplasseringar i internasjonale meisterskap og renn[endre | endre wikiteksten]

  • 1982: Nr 9 i Engelberg
  • 1983: Nr 6 i Planica
  • 1983/84: Siger i Lake Placid andreplass i Planica
  • 1985: Nr 3 i Štrbské pleso
  • 1985/86: Siger i Lake Placid, andreplass og tredjeplass
  • 1986/87: Fire sigrar; Lake Placid, Oberstdorf, Štrbské pleso, Oslo, samt tre tredjeplassar
  • 1987/88: To tredjeplassar, Thunder Bay og Lake Placid
  • 1988/89: Siger i Lake Placid
  • 1990: Nr 6 i Bischofshofen

Medaljar og besteplasseringar i noregsmeisterskap[endre | endre wikiteksten]

  • 1982: Nr 11 i normalbakken på Raufoss
  • 1984: Bronsemedalje i storbakken i Meldal
  • 1985: Bronsemedalje i storbakken i Bærum
  • 1986: Gullmedalje i storbakken i Oslo
  • 1987: Sølvmedalje i storbakken på Odnes
  • 1988: Nr 12 i storbakken på Rena
  • 1989: Nr 4 i storbakken på Odnes
  • 1990: Nr 4 i storbakken i Meldal

Bakgrunnsstoff[endre | endre wikiteksten]

Kjelder[endre | endre wikiteksten]

  • Sportsboken, aktuelle årgangar