Åkerbær

Åkerbær i bløming.

Åkerbærplante med frukt.

Åkerbær (Rubus arcticus) er ein plante i rosefamilien. I Norden har planten ei austleg utbreiing. I Sør-Noreg finn vi han i randområda mot Sverige. Han er vanlegare i Troms og Finnmark. I Nord-Sverige og særleg i Finland er han utbreidd. Han veks vidare gjennom Russland og i nordlege Nord-Amerika. Åkerbær veks på fuktig skogbotn, langs bekkar, på veg- og myrkantar. Han er sjeldan over skoggrensa, men veks enkelte stader frå Telemark til Sør-Trøndelag. Åkerbær har i Telemark vorte funnen 1300 m.o.h.

Utsjånad

Planten har ein krypande jordstengel med ein opprett stengel på 10 - 25 cm. Stengelen har få trekopla blad.Dei er sagtanna, glatte og tynne. I toppen av stengelen sit 1 - 3 smale blomar. Dei har 5 - 10 kronblad som oftast er rosa. Den brunraude eller djupraude frukta minner om bringebær.

Bruk

Dei aromatiske bæra vert brukte til syltetøy og dessertar. I Finland der åkerbær er vanleg, er åkerbærlikør ein spesialitet.

Anna

Åkerbær kan danne hybrid med teiebær.

Kjelder

• Ørjan Nilsson: Nordisk Fjellflora. Oslo 1995
• Pål Hermansen: Våre vakreste fjellplanter. Universitetsforlaget 1985
• C. A .M. Lindman: Nordens Flora. Oslo 1977