Eurovision Song Contest 1986

Eurovision Song Contest 1986
Offisiell tittel 31. Eurovision Song Contest
Dato
Finalen	3. mai 1986
Vertskap
Stad Grieghallen i Bergen i Noreg
Programleiar(ar) Åse Kleveland
Dirigent Egil Monn-Iversen
Kringkastar(ar) Norsk rikskringkasting
Varigskap
Opningsnummer
Finalen	«Welcome to Music» av Åse Kleveland
Pausenummer
Finalen	«Sang til Bergen» samt andre bergenske sanger av Sissel Kyrkjebø og Steinar Ofsdal
Bidrag
Antal bidrag 20
Debuterte Island
Attende Jugoslavia Nederland
Trekte seg Hellas Italia
Ikkje med Malta Monaco Marokko
Kart
ESC 1986 Map.svg
██ Land som deltok ██ Land som ikkje deltok
Røysting
Vinnar Belgia
Eurovision Song Contest
Göteborg 1985 Brussel 1987

██ Land som deltok i konkurransen██ Land som ikkje deltok i konkurransen

Eurovision Song Contest 1986 (ESC 1986) var den 31. gongen Eurovision Song Contest blei arrangert. Konkurransen blei halden i Grieghallen i Bergen i Noreg. Finalen fann stad laurdag 3. mai. Belgia vann konkurransen med songen «J'aime la vie», framført på fransk av Sandra Kim. Dette var første gong Belgia vann, og første gongen Noreg var vert for konkurransen. Noreg sitt bidrag, «Romeo» av Ketil Stokkan, kom på 12. plass.

Førestillinga

Åse Kleveland var programleiar, og opna med den fleirspråklege songen «Welcome to Music».

Eit av pauseinnslaga blei framført av Sissel Kyrkjebø og Steinar Ofsdal saman med Kringkastingsorkesteret (KORK) og barnekor. Dei framførte fleire norske songer på ulike stader i Bergen, med bergenssongen «Udsikter fra Ulriken» («Nystemte'n») som avslutting. Ofsdal spelte på fleire norske instrument som hardingfele, trekkspel og fløyte. Førestillinga lanserte Kyrkjebø som internasjonal artist.

Hendingar knytt til førestillinga

Sandra Kim som berre var 13 år då ho vann for Belgia, medan hovudfiguren i songen seier at ho er 15 år. Dei dåverande reglane fastslo at alle deltakarar måtte vere minst 16 år. Etter konkurransen kom det fram at ho berre var 13 år og Sveits, som kom på 2. plass, kravde at ho blei diskvalifisert, men dette blei ikkje følgd opp. Kim er dermed den yngste vinnaren av konkurransen nokon sinne.

Dette var den første Eurovision-konkurransen der kongelege var publikum, då både kronprins Harald, kronprinsesse Sonja og barna deira deltok.

Før sendinga blei det dramatikk utanfor Grieghallen. Ei 47 år gamal velkledd kvinne angreip kronprinsesse Sonja på veg inn. Kvinna tømde ei brusflaske som inneheldt ein blanding av vatn, olje og pepar over hovudet på kronprinsessa. Sonja tok opptrinnet med fatning, og sminkørane til NRK fekk raskt fjerna griseriet.

Ei hending i samband med arrangementet var at Sandra Kim med ei rekkje pressefolk tok turen med Fløibanen, men ikkje kom lengre enn til den nest-siste stoppestaden før Fløien grunna eit tryggingsproblem. Vogna seig eit par meter bakover før passasjerane måtte klatra ut av vogna, og ein av dei var Sandra Kim, som song seg til topps i arrangementet seinare på dagen i Grieghallen. Det skjedde ingenting alvorleg med uhellet, men det hamna i mange norske aviser neste dag. Uhellet førte også til ekstrainnslag i programmet.

Førstedeltaking og forfall

Island deltok i Eurovision for første gong dette året, etter at RÚV hadde fått satellittsamband med resten av Europa.

Hellas valde å ikkje delta då arrangementet fall på deira påskeaftan. Den italienske kringkastaren RAI hadde også vald å ikkje delta det året.

Bidrag

Nr.	Land	Artist	Song	Språk	Plass	Poeng
1.	Luxembourg	Sherisse Laurence	«L'amour de ma vie»	Fransk	3	117
2.	Jugoslavia	Doris Dragović	«Željo moja»	Serbo-kroatisk	11	49
3.	Frankrike	Cocktail Chic	«Européennes»	Fransk	17	13
4.	Noreg	Ketil Stokkan	«Romeo»	Norsk	12	44
5.	Storbritannia	Ryder	«Runner In The Night»	Engelsk	7	72
6.	Island	ICY	«Gleðibankinn»	Islandsk	16	19
7.	Nederland	Frizzle Sizzle	«Alles heeft ritme»	Nederlandsk	13	40
8.	Tyrkia	Klips ve Onlar	«Halley»	Tyrkisk	9	53
9.	Spania	Cadillac	«Valentino»	Spansk	10	51
10.	Sveits	Daniela Simmons	«Pas pour moi»	Fransk	2	140
11.	Israel	Moti Giladi & Sarai Tzuriel	«יבוא יום» («Yavo Yom»)	Hebraisk	19	7
12.	Irland	Luv Bug	«You Can Count On Me»	Engelsk	4	96
13.	Belgia	Sandra Kim	«J'aime la vie»	Fransk	1	176
14.	Vest-Tyskland	Ingrid Peters	«Über die Brücke geh'n»	Tysk	8	62
15.	Republikken Kypros	Elpida	«Τώρα ζω» («Tora Zo»)	Gresk	20	4
16.	Austerrike	Timna Brauer	«Die Zeit ist einsam»	Tysk	18	12
17.	Sverige	Lasse Holm & Monica Törnell	«E' de' det här du kallar kärlek?»	Svensk	5	78
18.	Danmark	Lise Haavik	«Du er fuld af løgn»	Dansk	6	77
19.	Finland	Kari Kuivalainen	«Never The End»	Finsk	15	22
20.	Portugal	Dora	«Não sejas mau para mim»	Portugisisk	14	28

Kjelder

• Den offisielle nettsida til Eurovision Song Contest

• «Eurovision Song Contest 1986, Bergen. Interval act w/ Sissel», YouTube
• Denne artikkelen bygger på «ESC 1986» frå Wikipedia på bokmål, «ESC 1986» frå Wikipedia på engelsk og VG.no, den 10. april 2011.