Anders Rambech

Frå Wikipedia – det frie oppslagsverket
Gå til: navigering, søk
Anders Rambech på eit måleri av Jacob Munch. Tilhøyrer Eidsvoll 1814.
Gjevilvasshytta med dei to bygningane. Den raude til høgre er Syrstadbygninga frå Rambech sin gard.
Foto: Trondhjems Turistforening

Anders Rambech, fødd Anders Graneng,[1] (2. september 176714. september 1836) var ein embetsmann, eidsvollsmann og stortingsmann frå Kvikne i Sør-Trøndelag.[2]

Rambech var fødd i Kvikne, faren arbeidde som pliktfut for Røros koparverk. Presten Anders Rambech i Kvikne tok seg av han og ga han òg etternamnet sitt.[1] Han vart tilsett som kontorist hos sorenskrivaren i Orkdal i 1783, og ti år seinare som fullmektig hos same. Same året, 1793, vart han eksaminert jurist. År 1800 vart han sjølv sorenskrivar i Orkdal, eit embete han hadde til han døydde.

Rambech var utsending frå Søndre Trondhjems amt til riksforsamlingaEidsvoll i 1814 saman med Jacob Hersleb Darre og Lars Larsen Forsæth. Han knytta seg til sjølvstendepartiet.[3]

Han var stortingsrepresentant i 1815-16, 1818, 1824, 1827 og på det overordentlege storting 1828. Også til 1830-stortinget var han vald, men sa frå seg. I 1815-16 var han sekretær i Stortinget og medlem av 12 komitear. Han var formann i komiteen om bondestandens næringsfridom og komiteen om det Ankerske fideikommiss. I 1818 var han stortingspresident og ei kort tid sekretær i Stortinget. Han var medlem av 18 komitear. I fem av komiteane var han formann, mellom anna om embetsmenns løner, om sølvverdien, om matrikkellova og om lova om elgen. Elles var han med i deputasjonen som Stortinget sende til kongekroninga i Trondheim. Under tingsamlingane 1824, 1827 og 1828 var han president i Odelstinget. I 1824 var han sekretær i både kyrkjekomiteen og i komiteen om innløysing av riksbanksetlane. Attåt var han på dei same tre stortinga medlem av valkomiteen og fullmaktskomiteen.

Rambech var busett på garden Syrstad i Meldal, og døydde der. Hovudbygninga og tingstugu frå Rambech si tid er framleis bevart, men tingstugu vart flytta til Gjevilvasshytta i Oppdal i 1848.[3]

Utmerkingar[endre | endre wikiteksten]

Rambech var innehavar av Nordstjerneordenen.[2]

Kjelder[endre | endre wikiteksten]

  1. 1,0 1,1 Arne Dag Østigaard. Anders Rambech. Norsk biografisk leksikon. Vitja 28. juni 2015.
  2. 2,0 2,1 Lindstøl, Tallak (1857-1925) (1914) «Rambech, Anders» – i: Stortinget og statsraadet: samt tillæg, s. 700 – Steen'ske bogtrykkeri, Kristiania.
  3. 3,0 3,1 Terje T.V. Bratberg (2014) «Anders Rambech og gården Syrstad i Meldal» – i: De kom fra alle kanter. Eidsvollsmennene og deres hus (red. Jørn Holme), s. 451—454 – Cappelen Damm, Oslo. ISBN 978-82-02-44564-5.